南翔﹕ 個人不喜歡,不推介,絕對失望

by | 1 月 15, 2012 | 上海菜, 中菜, 荃灣 | 0 comments

南翔饅頭店@荃灣
15/1/2012 18:00
$79一份四道菜二人上海套餐,價錢唔貴,點可以唔買。四道菜包括一款小食、一份小籠包、一款飯麵再加一個甜品,$79已經包括茶錢同加一,真係好抵。六點鐘到達南翔饅頭店,已經有十幾人等緊位,團購客可以先訂枱,唔洗等位直入,受到唔少人歧視。
玫瑰果味茶
店方提供六款茶選擇,見玫瑰花茶比較特別就點左一壺。茶有淡淡嘅玫瑰花香,入口好清香舒服。
雞絲粉皮
睇落幾大碟頭,有米白半透明色嘅粉皮、一堆雞絲、一堆青瓜絲同麻醬。粉皮入口夠滑身,算幾爽口彈牙。可惜雞胸肉絲比較嚡口,又無乜味,只靠淡淡嘅麻醬,似乎唔多濃厚。
蝦仁雞火炒飯
睇名都唔知咩叫雞火,上菜細看之下,原來係雞肉同金華火腿,仲有細細粒蝦仁。飯係炒得唔錯,非常乾身,粒粒分明。蝦仁都算幾新鮮爽口,但無乜味道可言。雞粒份量少得可憐,一樣無味。只有零零碎碎嘅金華火腿絲,帶些少咸香,仲有少少青豆同蔥粒,材料少得極可憐,基本上同蛋炒飯無太大分別,而且調味唔夠,白飯不如。
鮮肉小籠包
一籠六隻新鮮出爐,本以為熱辣辣嘅招牌菜應該唔差得去邊,點知完全錯晒。小籠包皮摺得工整,但一啲都唔豐滿,扁扁唔堅挺。皮絕對唔薄,頂部嘅摺疊位置更加硬實。咬開厚厚嘅外皮後,見唔到期望嘅汁如泉湧,只係暗藏左少許倒唔出嘅肉汁。還好豬肉餡細細一舊,腍腍地幾鮮味。只不過外皮同內餡配搭唔得宜,呢個水平嘅小籠包,隨街都食得到。
高力豆沙
可幸上枱時仲暖笠笠,相信都係新鮮即炸。蛋白外表炸得唔算太脹,欠缺左圓轆轆脹脹嘅可愛模樣。蛋白皮非常厚身,算不上海綿般鬆軟,亦略嫌淡而無味。咬開相對較厚嘅外層,良久先發現中間嘅豆沙餡,甜就夠甜,但香味不足,而灑面嘅幼砂糖亦作用不大。
素聞南翔呢個品牌,除左賣饅頭之外,佢嘅小籠包都相當出名,曾經獲獎無數。可惜今日一試完全極之失望透頂。招牌菜小籠包竟然係如此水準,質素未及得早前提過嘅紅磡$14一籠四粒。其他幾款前菜、炒飯,以及餐後甜品,都只係交出隨街都食得到嘅行貨,難道佢收得七十大蚊,真係俾番七十蚊功力?! 呢一餐的確只值七十九蚊,如果要加一,又或者要另加茶錢的話,已經覺得有點不值。相信拎住八十蚊,亦唔難搵到質素好佢十倍嘅小店,所以翻轉頭機會絕對等於零。
眼見七點離席時,門外仲有幾十人等緊位,不自覺丁出十萬個問號,究竟食客們為乜要等位等咁耐? 佢又何來如此大名氣呢? 相信我只接受「個人口味唔同姐!」呢個答案。

Archive

0 Comments

Submit a Comment

發佈留言必須填寫的電子郵件地址不會公開。

慕名而來食兒童餐

烏山明@荃灣 21/8/2022 12:00 今日黎愉景新城行街,俾小朋友自己揀午餐食咩。女女一見到麵包超人兒童餐即刻雙眼發晒。餐廳都相當大,在親子商場開餐,BB椅、餐具齊全,一家大細都坐得舒服。...

Häagen-Dazs

24/4/2022 大埔  17/4/2022 沙田   Häagen-Dazs@荃灣 17/5/2013 15:00 心花怒放 ($65)

尚點小籠包上海麵館

尚點小籠包上海麵館@沙田第一城 26/12/2021 12:00

最愛的台風

台風拉麵@荃灣 31/12/2019 12:00

滿江紅小甜甜

滿江紅小甜甜 18/8/2019 18:00 今日黎到旺角晚餐決定食啲刺激野。開飯網見到呢間評語不錯即管試下。中式菜館圓檯一大張,坐得舒服,連BB都有一張竹嘅BB椅。...