新潮老字號雲吞麵

by | 10 月 5, 2011 | 佐敦, 麵食 | 0 comments

六座雲吞麵@佐敦
5/10/2011 19:30

呢間小店坐落喺白加士街,隔離附近全部都係出名嘅老牌食店,睇個格局似係新開張。喺激安團購用$28買到一人滋味麵食套餐,包括小食、油菜、粉麵,仲有飲品,價錢唔貴,就去試試乜家伙。

柱候牛腩麵
一碗十級足料嘅牛腩麵,有五、六大舊牛腩,邊食邊尋到麵底仲有幾舊牛根,好似食極都食唔完,十級滿足。牛腩肉質爽口,都算幾入味,而牛根含豐富膠質感,比較結實,並唔係入口即溶嘅口感,但都幾有柱候味,味道唔錯。清湯底有少許腩汁味,再伴入少許青蔥同芫茜,味道更濃厚。

招牌雲吞麵
話晒招牌,果然有番咁上下料子。四大粒雲吞晶瑩剔透,薄薄嘅雲吞皮隱約睇到鮮蝦嘅橙紅色。非常鍾意佢嘅雲吞皮,薄之餘,亦好幼滑。皮靚餡亦好豐富,鮮蝦同鮮肉結實地撈埋一齊,蝦係原隻嘅,非常彈牙爽口﹔肉係鮮甜嘅,成粒雲吞味道好鮮味。
而幼麵都做得相當唔錯,麵質夠煙韌彈牙,有些少鹼水味,再配埋個湯底,就係最簡單、最傳統嘅港式風味。我並唔係什麼大師,唔會一啖就飲得出個湯有咩咩材料,只覺得湯底好清,好鮮甜,亦有好香胡椒味。返到屋企做番功課,知道湯係明火熬製嘅豬骨大地魚湯,乜湯都好,好味就得。

油菜
兩碟正常不過嘅油菜,最欣賞佢一細碟菜都好豪氣咁俾一大pat蠔油。家陣啲舖頭好少咁闊佬,佢唔加你一蚊都偷笑。

祕製豬頸肉
祕製即係新奇煮法,平時食開煎豬頸肉、炭燒豬頸肉、汁燒豬頸肉,今次整個炸豬頸肉。豬頸肉用炸粉包住拎去油炸,的確係炸得脆口,但炸粉仲厚過塊肉,而肉味都被炸粉蓋過,味道一般。

酥炸雲吞
四粒雲吞個皮都係脆到不得了,可能炸雲吞嘅重點不在餡,感覺炸雲吞嘅內餡比較薄弱,仍然有彈牙爽口嘅蝦,但風頭都俾炸皮蓋過。

幾樣食物都係質素良好,惟獨杯飲品真係抵鬧。有乜理由凍奶茶可以無茶味,凍檸蜜飲唔到菜蜜味,只覺得係檸水? 麵雖好,但最後衰喺杯飲品度,真係乜印象分都扣晒。

$28一個套餐,絕對抵食。舖仔細細,似乎係新開張,裝修企理,職員態度亦良好,又好熱情,係一間好親切嘅小店。後來得知佢始創於1966年喺藍田邨,算得上係老字號,所以麵食真係有相當質素。但可能係開分店掛,踩入白加士街,一條街周度都係更出名嘅老店,競爭實在太大。恕我孤陋寡聞,如果我有心去佐敦搵食,我會選擇更老字號嘅老字號。

無論點都好,六座雲吞麵嘅雲吞麵係我鍾意嘅味道。從佢嘅裝修、餐牌所見,感覺上佢比較似喺傳統上加入新潮、年輕嘅元素,有呢種膽量亦係好事,祝你成功。

Archive

0 Comments

Submit a Comment

發佈留言必須填寫的電子郵件地址不會公開。

杭州小籠包

美團外賣@福田 22/11/2023 18:00 薄皮小籠包 (7個) 13元﹕超驚喜高質素出品! 皮非常薄但都無穿,肉餡比較腍身,充滿肉汁。配上秘制醬汁係咸甜醬油,加微酸加辣,辣得好過癮。...

春水堂

沙田 9/9/2023 11:30

南洋吐司廚房

土司工坊 旺角 19/3/2023 10:00 佐敦 12/8/2012 12:30...

炊豕店巨型炸豬扒大阪燒

炊豕店@銅鑼灣 21/7/2022 12:00 難得今日黎銅鑼灣做野,先同同事一齊食個久違了的Happy Lunch。...

吉野家

吉野家12/6/2016 09:3010/7/2015 20:0012/6/2016 09:30@佐敦吉野家牛、炒滑蛋,漢堡米粉、飲品 $3110/7/2015...