尖沙咀東 25/1/2025 12:00

今日同朋友食飯，來到尖東韓脈食正宗韓國菜。星期六中午仲有Rotating Pot Pork Belly BBQ套餐，非常吸引。先來一系列精緻嘅韓式前菜，沙津香甜新鮮、香腸非常惹味。第一次試醬油味鵪鶉蛋，非常入味，蛋味香濃。好鍾意呢度嘅泡菜辣道適中，酸酸甜甜。

套餐揀左一份牛胸肉大醬湯。石鍋湯熱辣辣，散發出濃郁嘅豆醬香氣。湯頭厚重且充滿層次感，豆醬風味濃郁鹹香。材料非常豐富，大大件牛胸肉口感嫰滑肉質細膩。仲有好多瓜菜、豆腐，完完全全吸收湯汁精華，豆腐特別腍滑。呢碗大醬湯暖笠笠夠晒飽足，岩晒今日咁凍嘅天氣。

主菜豬五花肉燒烤用一個自動旋轉烤爐，可以均勻煮熟食物。長長一條五花肉切得略厚，喺烤爐上轉下轉下都幾得意。豬肉本身無太多調味，外面酥脆，中間嫩滑爽口，食得出豬肉本身嘅甜味。搭配新鮮生菜，自行加上豆醬，仲可以加少少洋蔥，味道香濃惹味。除左燒烤，仲可以揀泡菜炒飯，又係用旋轉烤爐即炒，熱辣辣，加左大量紫菜同泡菜，辣辣地麻油香味濃。

朋友話呢度必試招牌醬油蟹，蟹膏黃油勁多，入口即化，而且鹹香甘甜，海味香濃。仲配上牛油紫菜飯，滿滿麻油香味，加左蛋黃好柔和。

呢度嘅老闆係韓國人，態度非常親切友善，會細心幫你烤煮，服務十分好。好難得係尖沙咀可以舒舒服服食一餐咁好食嘅韓國菜。午市仲有單人餐，價錢唔貴，下次可以再試。