馬鞍山 9/2/2025 19:00

三哥排骨粗炒 $72﹕粗炒上舖滿排骨，幾乎餸仲多過麵。排骨煎到啱啱好，外面微焦帶嚼勁，內裡仍然保留住濕潤多汁。粗炒質感超有嚼勁，吸滿醬汁，鹹香略帶少少甜，仲有好多椰菜加甜味，炒得有鑊氣，但唔太油膩，非常不錯。

鎮江骨菜飯 $57﹕菜飯嘅菜不少，滿滿油香。鎮江骨色澤亮晶，炸得輕微焦香，肉質緊緻入晒味。鎮江醋酸酸甜甜韻，味道勁香，好開胃，撈飯一流。

南京牛肉蔥油拌麵 $57﹕濃郁嘅蔥油香氣撲鼻而來。麵條粗幼適中，入口彈牙有嚼勁，每一條都吸滿濃濃嘅蔥油。南京牛肉份量超多，牛肉厚厚一片，入口嫩滑多汁，濃郁牛肉香，同埋醬汁鹹中帶點甜。炸蒜微微嘅焦香仲有酥脆感，好香口。