馬鞍山 20/4/2026 12:00

星期一定食「燒肉拼盤定食」只需要$79，唔洗加一。一碟有齊牛胸腹、豚腩肉同雞腿肉。一擺啲肉落烤爐，一陣陣油脂燒烤嘅焦香，牛胸腹油脂分佈好靚，放落爐輕輕燒一陣已經熟。牛脂甘香，肉質非常腍滑，牛味好濃。豚腩肉最正就係要將表面燒到微微帶焦，逼出多餘嘅油分。咬落去外層微脆，肉質爽彈有咬口。雞腿肉燒到金黃酥脆，鎖住晒入面嘅肉汁，肉質幾嫩滑。各款肉類沾上甜甜嘅燒烤汁就最好味，或者加少少海鹽都唔錯。成個定食除咗有燒肉，仲配埋白飯、湯、沙律，滿足。

馬鞍山 24/3/2026 12:00

炙燒慢煮厚牛舌丼 $53﹕第一堂食堂食，賣相極討好! 厚切牛舌四大片，肉質變得軟嫩，爽爽地，仲有肉汁。牛味滿滿，仲非常入味。配上大量超超洋蔥同紫菜，超級好送飯嘅。日本珍珠米煮得粒粒分明，口感煙韌彈牙。熱辣辣嘅飯粒完美吸收晒牛舌嘅脂香同埋惹味嘅特製燒汁，鹹甜比例控制得啱啱好。跟餐仲有味噌湯同沙律，超級抵食!

馬鞍山 25/2/2026 12:00

牛胸腹定食 $98﹕肉片色澤鮮明，肥瘦比例極之平均，雪花紋理相當靚。將牛胸腹放上高溫嘅烤爐，即刻發出誘人嘅「滋滋」聲，陣陣牛脂香氣撲鼻而來。燒到表面微焦就可以夾起，大啖咬落去，肉質極之軟腍多汁。豐盈嘅油脂喺口腔入面瞬間溶化，牛味濃郁得嚟完全唔會覺得嚡口，口感極之細膩。將燒到熱辣辣、微焦惹味嘅牛胸腹沾滿餐廳特製嘅燒肉醬汁，然後直接鋪喺白飯上面一齊食。醬汁嘅微甜同牛肉嘅甘香完美結合，油香滲透落每粒米飯入面，非常惹味。定食仲有麵豉湯、沙律，豐富。