凍醬油餃子拉麵 ($46)
新奇、有趣、前所未有嘅新體驗。醬油湯、麵、材料，全部都係凍嘅。一碗凍拉麵，加送六大粒冰粒。相信有花心機計算過溶冰時間，食完成碗麵時，冰係剛好溶晒。凍左嘅麻油醬汁湯底，初期仍然有甜有味，但清水冰粒溶左後，湯變得稀釋。如果佢肯花多啲心機，改為用湯雪成冰，整個感覺更加良好。凍嘅餃子皮太厚太多粉，夾起變得鬆散。冷拉麵比熱湯拉麵更加清爽彈牙。夏天試試凍湯拉麵都唔錯，但仍有不少進步空間。

小食叫左日式醬汁炸雞 ($28) 同大人氣嘅炸芝士餅 ($28)

日式醬汁炸雞不止醬汁唔夠濃，仲出現嚴重乾硬化，肉已經炸到好硬好乾。

但炸芝士餅就好唔錯，外層類似麻糬年糕，炸得香口，內層係奶味濃郁嘅半溶芝士。食起來都能夠做到拉絲效果，讚!

埋單找數，多謝兩蚊，隔離位聽到即刻呆左。

正價$152，唔洗加一，用左團購券，只需補番二個大洋。正式黎講，以$62食到份量十足，拉麵都叫做OK質素，係滿意嘅。如果以正價黎計的話，旺角搵唔到飯食，又唔想食連鎖的話，呢度都可以係其中一個選擇。