10/8/2025

12:30 離開廣州東站，開始廣州地鐵遊，第一站就係珠江新城。先買單程票要再搭3號線到珠江新城，原以為地鐵直達，點知係體育西路就要玩轉車，初頭完全唔知咩事，幸好指示算清晰，總算到達目的地。地鐵站相當大，直結已經係幾個商場連住，最近嘅高德置地春廣場，非常新，大堂就有好靚嘅鳥籠裝置，真係好有春日感覺。

花城匯感覺老舊，比較地道嘅商場，所以人非常多。離開花城匯上到平台就見到遠處嘅廣州塔。外靚的確幾靚，值得打卡。穿過公園就發現一間幾靚嘅圖書館，再行過少少就係第一站「廣東省博物館」。

14:00 好彩事前有做功課，知道要先喺小程序預約，免費入場，2-3PM 指定時間入場都要少少排隊。入到門口仲要非常嚴格嘅安檢，人非常多，而且又熱，好彩流程算快。入到館內真係另一個天地，冷氣十分足。先後係唔同嘅館基本算睇晒所有打卡點，包括﹕廣州白切雞、野生動物館、恐龍骨模型等。展館大，空間感還好，大約行左未夠兩個鐘。但係部份館內仲要上落樓梯，其實推BB車真係好麻煩。不過總算係一個必須去一次嘅景點。