27/12/2025 13:30

午餐後慢慢散步去番海世界半潛艇，沿途係後壁湖港灣吹下海風都非常舒服。

14:00 墾丁之行重點其一就係海世界半潛艇，我地唔會濕身落水，但期望坐船出海睇下，全程舒舒服服就可以欣賞到海底奇觀。車票NT$380、兒童NT$280，來回船程約40分鐘。上船前要著救生衣，幾有儀式感。船唔算好大上層可以吹海風，離開避風塘就進入公海，風浪較大，海水更清。行落船艙底，兩邊都係特大玻璃窗，就可以近距離望到海底。後壁湖係墾丁海域嘅保育區，海水超級清澈，海洋生態非常豐富。透過半潛艇嘅玻璃窗，睇到魚喺珊瑚礁之間穿梭。但坐得耐就無乜驚喜，魚唔算多，亦見唔到傳說中嘅海龜，體驗過就算。