益田假日廣場 21/9/2025 17:30

元氣鵝肉飯 36元﹕飯面鋪滿咗切得整齊嘅鵝肉片，旁邊有滷水蛋同酸菜。鵝肉嘅份量好足，肉質好嫩滑，完全唔韌，鵝皮薄薄一層，下面帶少少脂肪，食落甘香豐腴。滷水汁好入味，鹹香甘甜，送飯一流。旁邊嘅酸菜正好可以中和滷水嘅油膩感，非常開胃。旁邊仲有幾片潮汕肉卷，主要係用豬肉碎、馬蹄、蔥同埋其他香料攪拌而成，入面嘅餡料非常彈牙，豬肉嘅鮮味同馬蹄粒嘅爽脆口感形成完美配搭。

滷水豬腳飯 33元﹕豬腳炆得非常軟腍，入口即化，充滿骨膠原，口感黏黏糯糯。滷汁完全滲透到豬腳入面，每一啖都係滿滿嘅膠質同滷水香。個飯同樣配有滷水蛋同酸菜，成個配搭好惹味。

潮汕炒魚麵 38元﹕麵身係魚肉打成嘅麵條，顏色白雪雪，魚麵嘅口感好彈牙，食落有淡淡嘅魚鮮味。魚麵同芥蘭、肉碎一齊炒，鑊氣十足。芥蘭爽脆，肉碎鹹香，成碟麵炒得乾身唔油膩。