Coco Park 21/9/2025 14:00

係鮮奶麻糬大滿貫 16元﹕賣相好吸引，主角係一大嚿白色嘅鮮奶麻糬，浸喺糖水底，旁邊圍住芋圓、小丸子、紅豆等。鮮奶麻糬質地介乎液體同固體之間，非常軟滑，超強拉絲效果，入口奶味香濃，口感順滑得嚟又帶點煙韌。配料方面，芋圓好Q彈，紅豆煮得夠腍，成個組合口感層次好豐富，味道甜而不膩。

冰豆花大滿貫 16元﹕配料同鮮奶麻糬嗰款差唔多，都係有芋圓、小丸子同紅豆，不過主角就換成一大碗冰豆花。豆花非常嫩滑，入口即化，豆味香濃，食落冰冰涼涼，非常消暑解渴。

芝麻糊鮮奶麻糬 19.9元﹕熱辣辣、又香又濃嘅芝麻糊，中間擺咗一嚿鮮奶麻糬。芝麻糊磨得好幼細，入口好順滑，芝麻味超濃郁。將鮮奶麻糬同芝麻糊撈埋一齊食，麻糬嘅奶香可以平衡芝麻糊少少嘅甘味，同時增加咗煙韌嘅口感。熱食嘅麻糬比凍食更加軟糯，啖啖都係香濃嘅芝麻味同奶味，食完成個人暖笠笠，非常滿足。

椰子大福嘅外觀雪白圓潤，外層煙韌軟糯口感好Q彈，椰子忌廉餡打得好輕盈幼滑，好似慕絲咁，充滿住清甜嘅椰子香氣。