31/3/2024 16:00

原訂今日下午去郵政博物館，出到捷運站突然落大雨行雷，大風大雨到完全行唔到，最後只係附近便利店抖一抖，決定取消呢個行程，改去行商場。見有時間，返酒店有放低啲手信先。

轉場去忠孝復興商圈，途中發生小插曲，原來細佬跌左隻鞋仔，問左SOGO客服搵左一輪，原來跌左係捷運站月台，唔覺意留有歷史記錄。

今日咁多蝦碌，就食餐好。呢度最出名就係鼎泰豐。去到取票，職員已話預計等兩小時。平時食飯一聽到呢個時間係從來唔會有興趣繼續等。幸好中午餐火鍋好夠頂肚，決定照排。

中間時間周圍行，去商場行下Daiso掃貨，樓上兒童部仲有得坐車車，有位座，可以休息一陣。

---

鼎泰豐 31/3/2024 20:00

行左個半鐘左右，大約8點就去番附近，點知去到票號去得好快，坐多一陣已經到號。係店門外先放BB車。安排坐係長梳化位，六個人坐都好闊落。揀咗幾款必吃菜式。

小籠包 NT$150 : 賣相好靚，粒粒都白白滑滑，咬落真係多汁，皮薄，肉餡甜甜的。

雞肉小籠包 NT$150: 比較原味的話呢個較淡口。

蝦肉煎餃 NT$230: 外皮煎得好脆 ，加左薄薄粉漿，餃子中間蝦肉好爽口，香甜。

菜肉餛飩湯 NT$170: 皮較為厚，清淡口味

油豆腐細粉 NT$160: 清淡，細粉幾滑。

菠菜腐竹 NT$310

紅燒半筋半肉麵 NT280: 湯底幾香，帶微辣，牛展肉味幾濃，麵條粗身有咬口。

排骨蛋炒飯 NT$280: 飯炒得乾爽，蛋味香，排骨肉比較實，味道濃。

蝦肉紅油抄手 NT$210: 醬甜辣最惹味，蝦肉抄手皮薄肉甜，不錯。

連加一 NT$2134

服務非常好，有專屬服務員照顧，跟進上菜速度，見我地食得慢，主動幫忙要求減慢。味道的確不錯，價錢實惠。但如果都要等位真係要等成兩個鐘，除非已經安排空檔好活動，否則好難吸引要再來。