大玉食堂熱炒100

墾丁大街 26/12/2025 17:45

由海生館開車去墾丁南部大約要30分鐘，好彩趕得切民宿取房卡，放低行李，簡單執少少野就出大街。墾丁老街搵食，司機推薦係當地大件夾抵食嘅小店。

一口氣叫咗九款經典小菜，每一碟都鑊氣十足，份量仲好足。
「鐵板牛肉」(NT$220) 鐵板上枱「滋滋」聲勁吸引，味道仲好香。牛肉極之嫩滑，配埋濃郁嘅黑椒汁，超級送飯。跟住上嘅「沙茶羊肉」(NT$150)，沙茶醬嘅獨特香氣完美帶出羊肉嘅鮮味，炒得啱啱好，勁惹味。而「蒜泥白肉」(NT$100) 就將肥瘦相間嘅豬肉切得薄薄，點埋特製蒜蓉醬，肥而不膩，滿口蒜香。「客家小炒」(NT$180) 材料豐富，有豆干、魷魚同豬肉炒得極之乾身香口。「薑絲大腸」(NT$180) 酸酸辣辣極之醒胃，大腸處理得好乾淨，咬落去煙韌彈牙，配埋大量薑絲，味道不錯。「酥炸鮮蚵」(NT$220) 外層炸到金黃酥脆，蠔肉爆晒汁，超鮮甜。而「豆酥蒸鱈魚」(NT$320) 就將滿滿嘅香脆豆酥鋪喺滑溜嘅鱈魚面頭，魚肉香滑，鮮甜無比，豆酥脆脆，送飯一流。另外，叫左兩款唔同蔬菜，清甜爽脆嘅「櫻花蝦高麗菜」(NT$100) 同「炒龍鬚菜」(NT$100) 蔬菜都翠綠嫩滑，簡單加啲蒜蓉爆香已經極之好食。