27/12/2025 12:30

司機帶我地黎呢間「邱家生魚片」，係墾丁人氣名店，日日都大排長龍，就係出名平靚正嘅新鮮海產。

必食平靚正綜合生魚片 (NT$100) 足足二十大片，片片都厚切，份量極之有誠意，視覺效果已經超級震撼。三文魚肉質肥美嫩滑，入口即溶。吞拿魚同旗魚口感鮮甜綿密，完全冇筋。希靈魚厚實鮮甜配埋爆脆魚籽，索索聲口感超級豐富，完全唔腥。刺身食得出新鮮度，口味略清淡，點少少芥末同豉油提升，呢個價錢無投訴。

金沙魷魚 NT$350﹕外層裹滿起沙嘅鹹蛋黃，炸得金黃酥脆。魷魚肉極之鮮甜爽嫩，香氣四溢，唔會覺得油膩。

三杯錢鰻 NT$350﹕熱辣辣以瓦煲呈上，九層塔同麻油嘅香氣非常香。錢鰻膠原蛋白豐富，口感煙韌彈牙，魚肉緊實鮮甜。吸滿晒濃郁嘅麻油、米酒、薑片同新鮮九層塔嘅香味。

蚵仔煎蛋 NT$300﹕煎得厚身鬆軟，表面帶點微焦，入面收埋咗好多肥美飽滿嘅鮮蚵。鮮蚵爆出鮮甜海水味，加上濃郁嘅蛋香，極之滿足。

蛋香雨來菇 NT$180﹕係台灣獨有嘅產品，雨來菇口感滑溜微爽，配埋炒滑蛋一齊食，清淡得嚟又極具層次，味道不錯。

清蒸+味噌鮮魚湯兩味 NT$910﹕揀左條紅魚，以一魚兩食烹調。第一味清蒸嘅原汁原味，肉質較緊實都幾清甜。第二味味噌鮮魚湯，味噌嘅豆香同海鮮嘅清甜好夾，仲加左好多滑豆腐，極之舒服暖和。