湘湘羊肉爐 恆春 27/12/2025 19:00

呢個天氣最啱就係打邊爐！今次我哋去試咗新開無耐極具人氣嘅「湘湘羊肉爐」。

揀左一個綜合羊肉爐 (NT$600)，一滾起嗰陣濃郁嘅羊肉香氣即刻撲鼻而嚟，湯底濃郁，溫暖滿足，大大件羊腩，有皮有筋，都相當腍滑。另外，揀左幾款火鍋料，小羔羊肉片 (NT$250) 份量都幾多，肉片切得厚薄適中，油花分佈都幾靚。肉質超級嫩滑多汁，微微嘅羊羶味幾香口，沾少少特製豆乳醬一齊食，辣辣地非常惹味。加入豆皮(NT$70)吸滿晒濃郁嘅羊肉湯底精華。最後，高麗菜(NT$70)新鮮爽脆，好清甜，中和咗食肉嘅微膩感。

羊肉炒麵 NT$120﹕麵條煙韌彈牙，完美吸滿晒濃郁嘅醬汁同羊肉精華。羊肉片好嫩滑，配埋清爽嘅蔬菜，口感豐富，醬香惹味。
羊肉燴飯 NT$120﹕香濃嘅醬汁緊緊包裹米飯，飯粒分明得嚟又夠濕潤。濃郁嘅肉汁同鮮甜嘅羊肉混句，鮮味十足，仲有好多蔬菜，飽足。
沙茶羊肉 NT$250﹕沙茶醬鹹香味足，羊肉肉質保持住軟嫩多汁，濃烈嘅醬香惹味，送飯一流
蔥爆羊肉 NT$250﹕大蔥嘅清甜同天然辛香，完美中和咗肉類嘅油膩感。羊肉肉質鮮爽，蔥香四溢，夠鑊氣。

---

香香豆花 27/12/2025 20:00

用UberEAT都可以叫甜品返酒店食，雪花冰送到黎仲係非常冰涼，無溶到，勁! 份量都幾足。
牛奶焦糖雪花冰 NT$70﹕雪花冰刨得極之細密，入口即化，質感超輕盈。冰底係濃郁嘅牛奶味，面頭淋滿甜甜嘅焦糖醬，真係透心涼。

OREO朱古力雪花冰 NT$80﹕朱古力冰底超級醇厚，有微苦嘅可可味，上面鋪滿厚厚一層OREO餅乾碎，味道甜甜，酥脆嘅餅乾碎同綿滑嘅雪花冰，一脆一軟嘅口感豐富。

芋圓燒仙草 NT$75﹕熱辣辣，足料，湯底順滑甘香，帶住天然嘅草本清甜。手工芋圓同地瓜圓煙韌彈牙，味道清甜天然。配埋生花脆脆，非常溫暖舒服。