10/8/2025

08:30 到達羅湖，廣深城際列車和諧號嘅車站就係平台行到最前。有一排電子售票機，買電子票，要綁定手提電話，逐張影回鄉證實名登記。第一次搞都搞左一段時間。最後成功買到C8004班次，09:00開，只需1小時就直達廣州東，無中途站。一等座只需90元，兒童仲半價44元。

買完票落樓下麥當奴買個快早餐，呢度嘅價錢絕對係香港價，而且出餐較慢，好彩臨時催一催，總算拎到餐趕上車。

08:45 開始入閘，用回鄉證入閘，隨即過安檢，流程都算快，但係比想像中嚴謹，可算係上飛機嘅級數。

08:55 入到大堂立即趕去閘口，一等座仲要行到最遠嘅車頭，係最後幾分鐘上到車，真係有啲趕。編到嘅座位係平排倒頭車三個位置，前一排剛好有一組四人座，中間仲有張枱可以食野，更加闊落。見得一站直達相信無人預約，就轉移去呢個闊位坐，四人坐得舒舒服服，可以開餐。

原味板燒雞腿炒雙蛋堡 39元﹕賣相都算幾靚，層次豐富內餡，特別係份量十足嘅炒雙蛋。麵包烘烤得鬆軟適中，板燒雞腿有炭火香味，雞肉幾嫩滑，調味咸香，雞蛋炒得蓬鬆柔嫩，質地綿密，蛋香濃郁。醬汁甜中帶鹹，仲有少少蔬菜增加脆嫩口感，非常唔錯。

德式圖林根風味香腸炒雙蛋堡 38元﹕深圳限定嘅口味，板燒雞腿換上德式香腸兩大條，腸衣幾脆口，肉質爽口彈牙，味道咸味，又有肉汁，唔錯。

10:02 已經到達廣州東站，離開車箱出番大堂，流程順利。離開火車站，過一條小馬路，就到今行住嘅全季酒店。時間尚早，簡單登記，放低行李就出發，開始廣州行。