深圳領展中心城 11/5/2025 16:00

是日母親節，估唔到有位食到呢間漂亮下午茶，仲放滿慶祝母親節嘅汽球同枱牌，打卡一流。

雙人餐138元

跳跳開心果舒芙蕾﹕視覺效果極佳，裝盤精致，兩大塊鬆軟嘅梳乎里輕飄飄，淋上淡綠色嘅開心果醬，仲灑上粒粒開心果仁碎同埋粉紫色嘅糖粉，配色靚。梳乎里本身輕盈同蓬鬆，空氣感十足，真係入口即化質感，口感濕潤。蛋味基底，蛋味同牛油香平衡，味道微甜。勁大份量嘅開心果醬先係亮點，食得出香濃堅果味，上面嘅糖粉原來係爆炸糖，為柔軟嘅梳乎里加一點刺激感，趣味十足。

提拉米蘇舒芙蕾﹕梳乎里充分保留經典意大利芝士餅嘅主要元素，鬆軟嘅梳乎里上舖左一層芝士忌廉，再灑上細膩嘅咖啡可可粉，顏色由淺至深漸漸過渡，整體感覺高級又細緻。可可粉香濃帶少許甘苦味，伴隨濃郁嘅芝士香味，中和咗甜味，整體味道平衡，還原度不錯。

紫提青檸氣泡水﹕結合咗紫提嘅香甜同青檸嘅酸爽，味道較酸，非常清爽，再加上氣泡嘅輕盈刺激，好適合喺炎熱嘅天氣中解渴。

蜂蜜百香果茶﹕結合咗蜂蜜溫和嘅甜香同百香果清新嘅酸爽，再加上茶底嘅淡雅氣息，蜂蜜天然柔和嘅甜味，將酸味中和。