香港迪士尼樂園 1/12/2024 14:00

午餐選擇左新園區嘅Frozen主題餐廳，座位唔算多，所以刻意錯峰時間近下午兩點先黎食，的確人流少好多，好快就搵到位。

掌櫃秘製羊膝啤酒汁配薯蓉、烤菜 $248

賣相非常吸引，羊膝大大件。經過長時間煮製嘅羊膝肉質非常嫩滑，用叉輕輕一劃就脫骨。羊膻味香濃，亦煮得非常入味，醬汁濃郁味道甜甜地，但就未感受得到啤酒香。隨餐仲有綿綿密密嘅薯蓉同烤菜，非常飽足。

森林雜菌手捲粉 $198: 一上枱已聞到陣陣菇菌香氣。大啡菇的確大，香味十足。手捲粉形狀幾特別，細細長條，中間可以吸附醬汁，松露忌廉汁奶香味十足，亦加左豐富嘅芝士，材料仲有好多野菌。雖然係全素食，但相當夠飽。

兩個套餐包括炸糖環，冰花形好完整，食落就好似炸薄脆，甜甜地脆卜卜。跟餐仲有一支支裝汽水。

阿德爾兒童餐 $138

包括白汁通粉，每粒通粉都係可愛嘅造型，好有聖火氣氛。主食有番茄醬肉丸幾腍有肉汁、香腸外皮脆脆中肉爆晒肉汁。仲有琛米炒雜菜等，相當均衡。最吸睛係小白造型棉花糖曲奇，靚到不得了，味道不太甜。兒童餐就無汽水但有一支礦泉水。

事前睇睇Klook有冇優惠餐券，發現套餐價錢無特別優惠，反而兒童餐$98，再扣積金只需$95就買到一張餐券。餐券可在園內換任何一份兒童餐，一般餐廳大約$100-110，呢間阿德爾餐廳$138都可以換到，非常抵食。至於成人餐就原價自費啦。