20/4/2025 12:30

企鵝酒店有專屬通道去樂園，基本上係幾分鐘腳程。門口安檢都非常快速，12:30已經成功入園。門口天幕打卡位仍然咁靚。

第一站先醫肚，揀左點評評分唔錯嘅快餐西餐「英雄家族餐廳」。餐廳都幾闊落，冷氣夠。未到飯點，人流唔算多，可以任坐。

香腸肉鬆披薩 68元﹕賣相不錯，面舖舖滿芝士，金黃色嘅芝士融化得剛剛好，濃郁嘅奶香氣撲鼻。切開中間就見到材料非常多，餅底較似厚批，微微焦脆嘅邊緣，中間非常鬆軟有嚼勁，有啲麵包感覺。材料分佈十分均勻，每一啖都可以食到肉香與鹹中帶甜嘅滋味，香腸鹹甜適中，加上味道甜甜嘅肉鬆，整體味道配合良好。最好就配上勁大杯汽水，多到飲唔晒。

至尊牛肉披薩 78元﹕呢款披薩都係舖滿金黃色嘅芝士，非常吸引，芝士融化至披薩表面，綿密細膩，帶來咸香濃郁嘅奶香氣。材料豐富，包括牛肉粒、青紅椒、洋蔥等。

卡卡兒童套餐 68元﹕套餐內容包括一件卡卡虎形嘅窩夫、炸雞塊、香腸配肉醬意粉同一飲品，分量對於小朋友嚟講相當足夠。卡卡虎形窩夫就係雞蛋味，微甜，口感都幾鬆化。炸雞塊外皮炸得金黃香脆，唔算油膩。意粉煮得較腍剛，肉醬番茄味道明顯，酸甜度算係恰到好處，有少許肉碎、粟米同紅蘿蔔等，都算營養均衡。

厚切肉眼牛扒飯（黑椒汁）88元﹕基本上就普通碟頭飯。肉眼牛扒圓圓一大片，切得夠厚，望落都幾夠分量。煎製火候適中，肉質都算鮮嫩，部份位置有筋位。黑椒汁味道濃郁，帶有輕微辛辣同胡椒香氣，撈飯食不錯。配菜仲有炸薯角同蔬菜等。

微訊搵到人借長隆海洋王國會員卡，全單打85折，抵!