深圳中航城 16/3/2025 19:00

炒雜菜 8元﹕除左雜菜仲有粉絲，粉絲吸滿甜甜嘅醬汁，非常滑溜入味， 口感煙韌。雜菜包括甜脆爽口嘅紅蘿蔔絲、椰菜、冬菇、木耳等，材料豐富，調味甜甜，麻油味香，細細一盒唔夠喉。

甜辣炸雞塊 15元﹕雞塊炸至金黃酥脆，外層脆脆的，唔算油膩，內裏嘅雞肉仍然保持嫩滑多汁。外層醺上甜辣醬汁，入口先嚐到甜甜嘅蜜味，隨後帶來小辣，味道不錯。

炸琵琶腿 9.9元﹕一隻小雞腿，外層炸得香脆，色澤對板，內裏保留住鮮嫩多汁，肉質腍滑，啖啖肉。外面加左蜜糖芥末醬，主調係嘅甜香微酸，最後一陣輕微刺鼻嘅芥末辣感。

帕瑪森芝士肥牛炸醬麵 32元﹕將濃郁芝士香氣、軟嫩肥牛同經典炸醬巧妙融合，幾創意嘅菜式，味道非常配合。麵條嫩滑彈牙，浸滿濃厚炸醬，豆瓣醬有獨特帶甜嘅鹹香，豆味香濃，本身麵底已好好食。再撈入啲帕瑪森芝士加一份奶香。肥牛肥瘦適中，薄薄一片吸收晒炸醬嘅醬汁，味道都好濃烈。

醬牛肉滑蛋拌飯 36元 ﹕醬牛肉份量都好多，牛肉非常入味，尚算鮮嫩多汁。醬汁類似豆醬甜醬油，醬香濃郁得黎卻又唔會過膩。滑蛋都算嫩滑，仍保留少許蛋液嘅質感，薄薄一層鋪喺飯面，伴隨醬汁用黎撈白飯就岩岩好。

隨餐送醬油鵪鶉蛋﹕有驚喜。鵪鶉蛋本身細膩柔滑，再浸入醬油醬汁，每一口都體現咗鹹、甜、鮮香。鵪鶉蛋蛋白彈滑細嫩，蛋黃濃厚，醬汁都完整滲透到蛋黃之中，一啖一粒，非常好味。

價錢唔貴，味道不錯，感覺幾正宗，值得再試。