Coco Park 21/9/2025 12:30

鐵板炸醬牛肉韓式意麵 38元﹕熱氣騰騰，非常吸引。個炸醬睇落好濃稠，撈埋意粉同牛肉一齊食，味道好香濃，甜甜哋嘅炸醬味好突出。牛肉份量唔少，而且幾嫩滑。麵條口感更加彈牙，掛汁能力都好好，每一啖都充滿醬汁。

多料牛肉韓式拌飯 38元﹕配料真係好豐富，有牛肉、芽菜、菠菜、蘿蔔絲同埋一隻太陽蛋，五顏六色，賣相好靚。將所有材料同韓式辣醬撈勻，飯粒索晒啲醬汁同蛋黃，食落口感層次好豐富，辣醬嘅甜辣味好開胃，加埋牛肉嘅肉香同蔬菜嘅爽脆，係一道好飽肚又滿足嘅主食。

無骨初雪炸雞 32元﹕呢個絕對係焦點，炸雞上面灑滿咗大量芝士粉，外皮好香脆，但入面嘅雞肉依然保持到鮮嫩多汁，完全唔乾。芝士粉鹹鹹甜甜，令到炸雞嘅味道更加惹味，食到停唔到口。

韓式炒魚餅 6元﹕魚餅切成一片片，食落煙韌彈牙，甜甜地。

炙烤肥牛 48元﹕賣相相當吸引，熱氣騰騰，香氣撲鼻，而且份量都非常多。肥牛片肥瘦適中，經過炙燒帶有微微嘅焦香，肉質好嫩滑，油香十足。菠蘿炙燒過味道非常香甜，果酸同甜味正好中和咗肥牛嘅油膩感，令到成道菜嘅味道好平衡。

埋單用92元代100元，抵食。