深圳購物公園 3/8/2025 11:30

聽唔少人講深圳有間叫「火桶1971」嘅韓燒好得，見點評餐真係抵食，只需要128元，即試。位置的確偏遠少少，比較難搵。

入座就送上韓式前菜同沙律。枱上仲有各式調味粉，可以調出自己喜歡嘅口味。

\牛排肉只係簡單用鹽黑椒，原汁原味。厚切五花肉肥瘦相間，燒到兩邊金黃香脆，油香四溢，再剪開一件件。用生菜包住燒肉、蒜片同泡菜一齊食，外脆內軟，油香十足，點少少海鹽已經好好味。大醬五花肉調味咸香，肉質嫰滑，味道不錯，仲有好豐富嘅蒜香味。

韓式海鮮蔥餅非常大份，煎到金黃色，邊邊位好香脆，餡料好足，有好多魷魚鬚、蝦仁同大蔥，每一啖都食到海鮮嘅鮮味同蔥嘅香味，口感外脆內軟糯，點埋個特製豉油，味道更加提升。

石鍋拌飯熱辣辣，石鍋底嘅飯焦香脆，配料有齊蛋絲、蘿蔔絲、青瓜絲等等，撈勻啲韓式辣醬同所有配料，甜甜辣辣好開胃，加埋飯焦嘅脆口，口感層次十足，非常滿足。

外面仲有自助任食嘅小食，韓式魚糕浸喺個熱湯入面，湯底鮮甜，口感彈牙，索晒湯汁嘅精華，食落暖笠笠。餐後仲有不同口味嘅雪糕自助，超解暑。