安牛任食火鍋攻略

by | 2 月 19, 2012 | 中菜, 九龍灣, 火鍋, 酒樓 | 0 comments

魯一居利寶閣宴會廳@九龍灣
19/2/2012 18:00

即使有免費穿梭巴士,總覺得Mega Box真係好遙遠,所以好日都唔黎一次。真心覺得果度嘅商舖生存空間好低,所以有中菜館要搞團購,$98火鍋任食兩小時,包埋加一、茶芥喎,咁抵。

老實說,食過之後,覺得一般質素, 其實都無諗過要記低。不過見團購有超過一萬人買左,咁受歡迎,都不妨hea寫做個record。如果團購友未食,又或者有興趣試正場嘅朋友,都可以參考下。

事前準備
1. 必須晨早預約。十二月初預約時,職員話即日至一月份嘅檔期已經完全滿晒,建議早兩個月前預約唔過份,始終假日多人,而且菜館唔算十分大,當天所見,全部人都係食火鍋,都幾爆場。

正場
2. 一定要早到。雖然話晚市六點至十點半,但強烈建議食早場,始終下場refill速度係未知之數。早趁職員落場時間準備充足,樣樣材料乾淨整齊,點都會食得開心啲。而且敬請六點前齊腳,因為菜館真係唔到六點都唔開燈,六點正已經有長長嘅人龍,等安排入座都幾費時。

3. 入座後,要立即填表申請食物,因為遞左表都要等差唔多十分鐘先有湯底,食材大約要等十五分鐘。餐紙有七款湯底可選,仲有八款任叫嘅食物,另加六款優惠價嘅海鮮類貴野。餐紙default每枱得兩張,其實每次叫野可以唔洗諗,怒寫報大數。多次試驗下,估計菜館廚房佬對數量嘅定義為每一份等於一件、一片、一粒或者一pat。
3a. 火鍋係一人一鍋唔洗爭,試過黑松露上菌鍋,清湯底加一pat黑色野,有啲菇味,唔知真定假嘅黑松露,但味道幾得意。馬來沙嗲鍋都係清湯底加沙嗲醬,味道都夠,但較油膩。聽講香茜皮蛋湯都正常,可試。
3b i. 免費任叫嘅食物,包括是次火鍋主題食材美國安格斯牛肉,比一般雪花肥牛靚啲、肥啲,牛味認真唔錯,有少許膻味,輕涮十秒就食得,夠腍夠滑,值得怒點一百份。
3b ii. 除左安牛,仲有本地肥牛,總覺得比安牛差少少,有安牛就唔洗特別揀本地牛。
3b iii. 鯪魚肉有手打鯪魚球同鯪魚滑兩款,其實味道一樣,建議揀鯪魚球,因為無咁捩(口棄) [註﹕ 呢hea]。
3b iv. 仲有黑豚肉片,比一般豬肉片肥啲,肉味都唔錯,甜甜地。
3b v. 仲有其他味道正常嘅材料,包括魚皮餃、韮菜豬肉餃同竹串海蝦等。
3c. 要自費嘅費野包括美國桶蠔、龍蝦、帆立貝等,無叫,唔講。
By the way,佢送果杯竹蔗水又幾好飲,清甜足料,但太細杯。

4. 喺個鍋未到之前,見人少少,未出現人龍,就要先去自助bar拎野食,最好分工合作, 一次過拎定多啲,因為到中段時間,人龍會排到出門口。自助配料都有唔少選擇,一般火鍋要食嘅材料都有齊。材料一盆盆放得整齊,經過一個鐘時間受盡催殘之後,都總算無食唔落口嘅甩皮甩骨情況,相信當日嘅客人都比較斯文,而樓面阿姐都有花時間整理。

5. 一人一鍋係用細爐仔,一舊迷你燃料燒到尾,都預左火力唔猛料,所以煲勁耐都唔滾。所以要採取一次過大堆頭放料策略,每次水滾就要將想食嘅生料冚唪唥放晒落去,一定要加蓋,而且唔可以中途開蓋,熱氣一走晒又要由頭黎過,耐心等候係必須的。特別好味嘅有,彈牙多汁牛根丸、豬頸肉、咖哩味雞軟骨。炸魚皮都唔錯,本身有少許咸味,落水揈[註﹕ fing]兩野就上岸時間剛剛好,吸收啲湯味,仲脆脆地。

散場
6. 團購價$98已包茶芥同埋加一服務費,無另加貴價海鮮的話,就無其他虢礫(口緙)嘞[註﹕ kick溺卡嘞]收費。食飽想閃嘅時候,禮貌上叫番阿姐埋單,阿姐話你走得先好走。

呢個火鍋除左有安格斯牛肉之外,真係無乜特別,只不過團購唔洗一百蚊有得任食,而且款式都算多,叫做幾抵。正價任食火鍋,都係正路價錢,大約一百鬆一位,另計茶芥、加一。除左任食火鍋之外,仲有飲茶點心放題,宣傳板寫一位大約五十幾,好似好抵,但原來茶芥收十蚊一位,另計加一,夾夾埋埋七十幾蚊埋單,好似吸引力唔大。

Archive

0 Comments

Submit a Comment

發佈留言必須填寫的電子郵件地址不會公開。

德福Foodeli

Foodeli@九龍灣德福 School Food Blooming Mari & Chimac 5/6/2022 12:00...

和味館

和味館@長沙灣 25/8/2019 12:00 難得黎到長沙灣探麻麻,帶老人家去飲茶慢慢歎。就係屋企附近隨便搵間茶樓,原來是新開無耐的,環境不錯,相當新淨舒適。叫幾樣點心食下。...

滿江紅小甜甜

滿江紅小甜甜 18/8/2019 18:00 今日黎到旺角晚餐決定食啲刺激野。開飯網見到呢間評語不錯即管試下。中式菜館圓檯一大張,坐得舒服,連BB都有一張竹嘅BB椅。...

莆田

莆田@銅鑼灣11/8/2019 12:00適逢牛一,出銅鑼灣行下街,午餐選擇左一向非常鍾意嘅餐廳,利舞臺廣場分店仲環境舒適。坐低先飲啖菊花茶,幾鍾意果份清香。一品醉蚶...

熊小館

7/7/2019 15:00熊小館@九龍灣喺Mega...