益田假日廣場 21/9/2025 17:00

點評套餐都幾抵食，有麵，有小食，有飲品。

黑鑽松露秘汁拌麵套餐 54元﹕黑松露獨有嘅香氣撲鼻而來，非常誘人。麵上面有溏心蛋、叉燒、蔥花，中間仲有一大羹黑松露醬。趁熱將所有材料同麵底嘅秘製醬汁快速撈勻，麵條粗身口感極之彈牙掛汁，每一啖麵都充滿住濃郁嘅黑松露味同醬油嘅鹹香味，叉燒帶有焦香，溏心蛋熟成度剛好，蛋黃入味，整體味道好有層次感。套餐仲有鹽酥雞米花同椰子水，雞米花炸到金黃酥脆，外皮好香口，入面嘅雞肉依然保持到嫩滑多汁，鹹香中帶點微辣，非常惹味，食到停唔到口 。椰子水椰味香濃又清爽。

濃厚豚骨湯拉麵套餐60元﹕湯底呈奶白色，表面有層薄薄嘅油，湯頭非常濃郁，充滿骨膠原嘅感覺，拉麵係傳統嘅幼身直麵，軟硬度適中，能夠索到湯汁。叉燒肥瘦均勻，入口即化，溏心蛋亦做得好出色，算係一碗好有水準嘅傳統豚骨拉麵。