11/3/2011 (星期五)

第二日去路環睇熊貓，順面去埋澳門另一間葡撻專門店。

可能因為路途遙遠，冇乜人會選擇平日去食，所以買番黎嘅安德魯葡撻，係唔熱嘅。
雖然如此，佢個皮仍然係好鬆化，好酥、好脆，脆到咬一啖，跌一啖落街。感覺上，呢間嘅酥皮比瑪嘉烈更出色。雖然只係微暖，但個蛋餡仍然係好香濃。相信如果係新鮮出爐熱辣辣的話，一定更好。
老實說，雖然係好味，但兩間其實差唔多，如果要山長水遠走入黎的話，咁不如去番瑪嘉烈算數。

完成路環之旅，午飯時間當然係官也街附近最好。選擇左大利來記菠蘿豬扒包。
只需等五分鐘就可以送入口。大大塊豬扒相當鬆化惹味，配菠蘿包係更好味。
但整體好似不及上次黎食，冇左上次果種感動嘅衝擊。唔怪得知，越來越多劣評，睇黎下次再黎搵第二間算。

晚餐喺福隆新街解決，選揀左祥記麵家。

蝦子撈粗、牛雜蝦子撈麵

幼麵係超級咁煙韌彈牙，請多用點牙力。
蝦子有好香嘅蝦味，而且牛雜都係好入味。
印象中，好似係呢間好過隔離果間。

金沙鯪魚球配蜆蚧汁

外層用米粉包住來炸，炸得非常香脆，外面乾爽，內面仍有肉汁，魚肉一啲都唔腥。炸到咁勁，但食落都唔覺油膩，好野!
蜆蚧汁係超咸，蚧味好濃，只需沾少少，已經可以充滿晒成粒鯪魚球。