糖圓園@沙田
31/7/2011 20:30

越來越鍾意進軍香港團購市場無幾耐嘅集購城。以多次嘅經驗所得，集購城嘅優惠係比其他團購為高。今次又一抵買之選，$15買到$50現金券食甜品。曾經幫襯過糖圓園，覺得質素唔錯，老實講唔做團購都冇問題。今次做埋團購，當然義不容辭。

芝麻糊豆奶凍 ($21)
喺傳統嘅凍芝麻糊之上，加一個豆奶凍。呢一個黑白配，可以提供三種食法。
芝麻糊濃度適中，味道唔太甜，好香芝麻味。但今日可能失左手，芝麻有少許燶味，有好輕微嘅甘苦味，但足以證明唔係開粉。
豆奶凍好清甜，豆香味充足，似維他奶嘅豆奶味道，而且彈力非常高，有煙韌嘅口感。
兩者獨立食，味道已經好唔錯。將佢融為一體後，味道亦非常匹配。

蛋白雪蛤燉鮮奶 ($30)
相信係即叫即燉，等候需時。新鮮熱辣送上時，已聞到陣陣奶香味。
入口順滑之餘，奶味亦非常濃郁，鍾意清淡口味嘅朋友，可能會覺得味道略甜，但我一點都不介意，因為我嚐甜。
講起燉奶，相信澳門嘅出產係出晒名嘅。講真，糖圓園嘅燉奶未及澳門保健牛奶公司咁入口即溶。質感相對比較實在，結實，但仍然能夠保持軟滑嘅口感。面層加左一大湯匙嘅雪蛤，用薑汁糖水煮過，實屬滋潤佳品。

糖圓園似乎主打湯圓，但據聞一般般，所以一次都未試過。
沙田區難得一見嘅企理甜品舖， 味道價錢都係合理。無任何優惠下，大大話話都光顧過三幾次。今次仲有團購優惠，總數$16就可以食到以上兩款，當然更加心滿意足，值得繼續支持。