In 城市廣場 7/10/2025 11:00

濃抹干酪米布布鮮奶茶﹕單睇賣相已經覺得好吸引，杯底係滿滿嘅米布布，中間係翠綠嘅濃抹茶鮮奶，最頂層再鋪咗層厚實嘅干酪芝士奶蓋，綠白分明嘅漸層效果幾靚。奶蓋帶有微鹹芝士香，綿密得嚟唔會太膩，抹茶味濃郁甘醇嘅，飲得出回甘嘅微苦。最驚喜嘅係底層嘅米布布，軟糯得嚟帶點米香，煙煙韌韌嘅顆粒感，令到成杯飲品嘅口感層次極之豐富。

咸法酪米布布鮮奶茶﹕結合咗咸味芝士、米布甸同鮮奶茶。最頂層係一層厚厚嘅奶蓋，鮮奶茶，而杯底就係奶白色嘅「米布布」。頂層嘅咸法酪奶蓋鹹香濃郁，帶有芝士嘅醇厚，正好中和咗奶茶嘅甜度。鮮奶茶本身茶味突出，唔會太甜，同奶蓋好夾。底層嘅米布甸帶有淡淡嘅米香同甜味，令到成杯飲品嘅味道不錯。