深圳大沖 11/5/2025 12:00

環境非常韓式，揀左一個小包廂好有Feel。入座即送上前菜四小碟，原來可以無限任添。包括微辣微酸嘅韓式泡菜、醬油花生、醃漬紫瓜同南瓜蓉。南瓜蓉綿密幼滑，勁香南瓜甜味，小朋友瘋狂encore。此外，適逢母親節，送上雪耳糖水，非常滋潤，清甜，雪耳仲好滑，不錯。今行叫左兩個套餐。

延谷推薦雙人餐 183元

長白山芝士排骨﹕絕對係招牌菜色。一大鐵鍋送上，排骨同雞份量多，成道菜式既吸睛又好味。當熱辣辣嘅芝士慢慢淋上時，香濃嘅芝士香氣散出，排骨表面就被芝士包住。再喺爐上熱一陣，芝士冒出氣泡，視覺效果一流。本身排骨同雞係韓式辣醬味，甜甜辣辣都幾刺激，排骨類似金沙骨，夠骨肉分離，肉質不錯，仲入晒味。加上芝士，多一陣濃郁嘅奶香同咸香味。亮點係軟糯口感嘅年糕，煙煙韌韌，吸晒醬汁，非常好食。

延大炸雞﹕炸雞雞大大隻，外皮香脆誘人，麵衣薄而脆，雞肉內裡鮮嫩多汁，肉汁多到流晒出黎，原汁原味只係簡單咸味。

海鮮魚餅鍋﹕充滿韓國風情，以經典韓國魚湯為基底，帶有自然嘅甜味，能夠完美激發海鮮嘅鮮味。魚餅鍋款式多，唔單止有傳統嘅韓式魚餅，仲加入咗各種鮮美嘅海鮮，例如大蝦仁、蜆肉等。不同款式嘅魚餅都好吸引，有薄片形，有圓柱形。魚糕新鮮彈牙，本身魚肉甜甜的，吸滿咗湯底嘅清甜，好鮮味。邊煮邊飲湯，非常正。

韓式手抓飯﹕賣相靚，滿滿沙律醬加上色彩非常討好。熱辣辣嘅手抓飯，上面舖滿紫菜，芝麻油香氣撲鼻而來，紫菜仲脆卜卜。加左唔同蔬菜同肉碎，仲有大量沙醬醬撈埋一碗。味道濃郁香甜，味道豐富又夠營養，令人感覺健康又滿足，岩晒小朋友。

韓式鍋雙人餐 143元

元氣部隊鍋﹕份量多，勁澎湃。部隊鍋嘅靈魂所在無疑係佢濃郁嘅湯底。湯底由辣醬、豆瓣醬及多種香料熬製而成，味道濃厚但唔會過鹹，同時散發出韓式辣香，味道唔太辣較溫和。部隊鍋嘅另一亮點在於佢豐富嘅配料，肥牛油脂適中，口感軟腍。午餐肉咸香味足，年糕煙煙韌韌，拉面爽滑吸收晒湯底味道，最後芝士慢慢融化混合，集香濃辣於一身。

明洞炸雞塊﹕外皮脆脆，炸炒薄薄，雞肉原汁原味，幾嫰滑多汁。可以沾上酸甜嘅沙律醬，香脆可口。最特別係炸過嘅年糕條，外脆內裡煙韌，夠特別。

辣魚餅年糕條﹕以特製韓式辣椒醬為基底，每條魚餅同年糕都索晒醬汁。辣椒醬有刺激嘅辣感，仲有醬香酸中帶甜。魚餅皮薄肉厚，質地相當柔嫩又彈牙，有魚肉香味。年糕煙韌彈牙，口感扎實非常有嚼勁，本身米味香濃，與辣醬完美地結合，非常惹味。

打卡送脆蝦片一份，蝦味濃，咸鮮，香脆唔油膩。另一款揀左米酒沙冰，大大杯，米酒味香甜為主，帶淡淡酒味餘韻，入口勁清涼，相當不錯。