領展中心城 23/2/2025 12:30

深圳慫火鍋廠係一間好特別嘅火鍋店，值得一試！

首先，講下火鍋湯底。果蔬清湯(18元) 內加入咗多種新鮮水果同瓜菜，散發陣陣清甜果香，每一口湯感覺都好清爽，煮出嚟嘅味道帶有淡淡嘅果甜，正好中和咗油膩感。濃濃番茄湯(18元) 係勁濃郁嘅番茄味，有大大件鮮番茄，口感酸甜濃厚，回味無窮，令人一試愛上。最後一格選左免費嘅清水湯底，網友教用自助醬料加調味。

鮮。頭牌黃牛肉 48元﹕手切牛肉，賣相靚，肉片油花分佈均勻，入口滑嫩，品質都唔錯。

雞腿肉 9.9元﹕每件雞肉帶輕微嘅雞皮，口感非常嫰滑，抵食。

原切雪花肥牛 46元﹕肥牛片薄且柔嫩，油花分佈均勻，入口即化。

丸子三姐妹 28元﹕三款丸子牛丸、魚蛋、墨魚丸，鮮甜彈牙，口感不錯，抵食。

慫廠萌娃套餐 18元﹕最抵食嘅兒童餐。午餐肉、牛丸，粟米、蟹柳，仲有飽肚嘅手工麵。麵條彈牙幼滑，味道不錯，適合小朋友。

不限量自助台小料同燜飯 每位7元﹕紅蔥油燜飯絕對讚，新鮮熱辣，飯香味濃，可以食幾碗。

廣西茉莉輕奶綠加豆乳丸子 15元﹕味道對板，價錢合理。

港人優惠送鮮乳山生蠔 2隻﹕的確超巨型又新鮮，煮熟後非常鮮甜滑嫩，肉汁豐富，好幼滑，仲無乜腥味。

另一個大亮點係免費提供雪糕，餐後可以嚟一杯清甜冰涼嘅雪糕，化解食火鍋後嘅膩感。雪糕口感細滑，牛奶味香濃，甜甜的，非常好味。

適逢細路仔生日，揀左人人開心低調版生日服務，真係大大加分。店員哥哥模擬生日蛋糕吹蠟燭環節，送蛋糕公仔給小壽星，過程非常暖意。員工仲主動送上金幣俾小朋友夾公仔，總算有些少收穫，最緊要小朋友開心。

埋單只需 215元。點評48元買50元代金，平多8元。二百零數食火鍋，味道不錯，有得食有得玩又有禮物，絕對讚!