10/8/2025

10:45 廣州東站下面就有一個PO PARK 東方寶泰商場，似乎係舊式地下近年重新改裝，有好多餐廳。今行第一餐決定食一個超人氣廣東點心名店，仲要連續七年點評必吃榜。「祿運茶居」作為可算廣東點心老字號，呢間分店就比較時尚。11點未到已經入座率不俗，飯點時間更一定要等位，真係勁高人氣。係點評買一份二人套餐連茶錢 109元，基本有齊各式招牌點心。

金莎脆皮紅米腸﹕正係招牌創意一味。柔軟嘅紅色腸粉表包住脆皮春卷，若隱若現見到春卷非常豐富。紅米經過蒸煮後散發淡淡嘅米香，粉皮薄得黎又夠堅韌，保持著彈牙口感。中間脆皮卷超級酥脆，內餡有大大隻彈牙爽口嘅鮮蝦，加上唔同配菜。三款沾醬有甜豉油，花生醬同辣豉油，各有特色。

西汁黑椒牛仔骨﹕賣相豐盛，牛仔骨大大件，表面被濃郁嘅黑椒汁包裹。牛仔骨肉質嫩滑，骨肉均稱，油脂分布均勻，充滿牛肉嘅甜味，仲有超甜洋蔥。醬汁質地濃稠，黑胡椒香氣相當濃烈，辛辣刺激。下面仲有南瓜，香軟清甜，加上黑椒汁辣得刺激。

荔灣鮮蝦艇仔粥﹕粥面平滑如鏡，上面舖滿唔同材料。粥底濃稠綿密，米粒已完全融化於湯汁之中，入口溫潤甘甜。材料有水魷魚、蛋絲、油炸鬼等，仲有脆卜卜嘅花生米，非常傳統嘅粵式粥品。

手磨新疆紅棗糕﹕天然棗紅色澤，表面光滑細膩，內裡質地綿密煙韌彈牙，濃郁嘅紅棗香氣撲鼻而來，天然甜香，溫和而持久。

祿運特色三拼包 22元﹕三個精緻嘅小包整齊排列，每個都有唔同造型，幾可愛。新鮮熱辣，包包都非常軟熟。第一款包係傳統白麵皮，上面有隻大頭招牌公仔，內餡係經典叉燒。咬開後叉燒醬立刻湧出，醬汁超多，仲有好多叉燒肉粒，軟嫩香甜，係最為人熟悉嘅粵式風味。第二款BB仔係流沙奶黃包，包皮圓潤飽滿，柔軟有韌性，內裡嘅奶皇餡緩緩流出，熱辣辣，奶黃香仲有鹹蛋香氣，甜味適中而不膩口。全啡色就係核桃包，包皮帶黑糖香氣，中間係豐富嘅核桃醬，加上顆粒核桃碎，散發著獨特嘅堅果香味，甜度溫和，核桃碎酥脆爽口，有驚喜。

爆漿黑芝麻卷 18元﹕最愛甜品菲林卷，卷狀造型工整美觀，每個切面都能清晰見到層次分明，上面仲插住一枝小吸管，可以自行唧入芝麻醬營造爆漿效果。黑芝麻味道濃郁，甜度控制得恰到好處，口感煙韌，加上絲滑嘅芝麻漿，更加香甜濃郁。

價錢合理，散叫的尾數仲可以38.7元買40元代金券，再平多少少。

點心味道不錯，菊花茶夠香，點心好味，感覺地道。打卡有冰箱貼送，質感厚實，非常不錯。

喜茶 烤布蕾抹茶冰 22元

今期聯乘Chiikawa，杯杯幾可愛。飲品基底係翠綠色抹茶冰沙，加上焦糖色烤布蕾，同埋珍珠，幾吸引。頂部布蕾層烤過，散發焦糖香氣。布蕾本身非常絲滑，味道香甜。抹茶清香自然，沙冰質地細膩順滑，沒有粗糙冰粒感。兩者撈埋一齊甜道幾平衡。最後珍珠煙韌彈牙，黑糖味香，為飲品加多一點甜度。