28/12/2025 17:00

Check In酒店之後，好快就放低行李，整頓後就出發高雄第一站。由酒店步行去前金捷運站，再搭十五分鐘去巨蛋站。出口一條直路就見到瑞豐夜市嘅大招牌。瑞豐夜市係高雄最大型嘅夜市，黎到時間尚早，檔攤都係準備營業中。

天使雞排 NT$100﹕任何時間都係大排長龍，係夜市No.1人氣店。呢塊雞排真係極之厚身，外皮炸得金黃酥脆。大啖咬落去即刻發出清脆嘅索索聲，入面嘅肉質依然保持極度軟嫩多汁。微甜嘅特製調味完美帶出雞肉鮮味，味道香甜。食落完全唔會覺得乾爭爭，只加左椒鹽，惹味到停唔到口。

鹽酥菇 NT$70﹕份量都幾多，粒粒菇幾飽滿，外皮炸得金黃酥脆，中間嘅菇超級Juicy，爆晒汁，雞脾菇非常鮮甜。

多多米狀元糕 NT$80/4件﹕呢款傳統小食極之有驚喜，即叫即整，睇住製作過程都好有趣。熱辣辣出爐，散發陣陣濃郁嘅天然米香，每個糕圓轆轆，上面都見到加左邊款材料。米糕口感極之煙韌軟糯，入面滿滿嘅餡料，香氣撲鼻，味道甜而不膩。經典口味有花生、芝麻，都落得好足，鮮奶麻糬多一份奶香。抹茶帶有甘香。巧克力口味就係最香甜。

黑豬肉香腸 NT$100/3條﹕炭火將外層燒到微微帶焦香，腸衣非常香脆，肉汁豐富香甜。

章魚爆爆起司章魚燒

綜合海鮮章魚燒 NT$120﹕外皮微脆，入面嘅粉漿極之綿密，入面嘅餡料真係極之有誠意。綜合海鮮有章魚、干貝、鮮蝦各兩件。章魚味包住一塊鮮甜彈牙嘅大章魚肉﹔干貝超大粒勁鮮甜﹔鮮蝦相當爽口彈牙。半溶芝士拉晒絲，配埋面頭飛舞嘅木魚花同香甜沙律醬，邪惡得嚟極之惹味。

吳家脆皮臭豆腐 NT$100﹕呢款係台式臭豆腐，臭豆腐炸到金黃色，極之香脆。散發陣陣咸酸味。豆腐依然保持住綿滑軟熟嘅質地，完美吸收晒特製嘅蒜香醬汁，鹹香味極之濃郁。夾埋旁邊微酸爽脆嘅台式泡菜，味道酸酸甜生，味道豐富，仲中和咗炸物嘅微膩感。味道就係台北深坑豆腐街嘅味道。

泰奶了

泰式奶茶 NT$80﹕呢杯泰奶茶呈現住經典嘅橘紅色，茶香極之濃郁醇厚。入口嗰陣，煉奶嘅香甜同茶葉嘅回甘，質感極之順滑。最重要係夠晒冰凍，順喉而下即刻消暑解渴。

呢個夜市非常不錯，檔攤夠多，幾款小食都非常好食。行加食到6:30PM，非常飽足。