30/12/2025 20:00

高雄出名熱鬧嘅夜市，仲要係酒店附近，必去啦! 呢度條路都幾闊落，就算人多，都可以慢慢行，推住BB車或者同朋友並排行都冇問題，兩邊攤檔燈火通明，都幾熱鬧。

清甜滑溜嘅杏仁豆腐，食落冰冰涼涼。

𩵚魠魚焿，魚塊炸得香口，配埋濃稠湯羹，新竹米粉好滑。

花枝煎同蚵仔煎即叫即製，外層煎到香脆中間腍滑，入面又海鮮料都幾多。

鳥蛋蝦球，鵪鶉鳥蛋加上爽口大蝦，配上醬汁，酸酸甜甜，小朋友最鍾意。

德國豬手香脆惹味，啖啖肉。

尚蓋香炒飯超人氣，都要等一段時間。成個檔都陣陣香氣，師傅拋鑊拋得好熟手，成碟飯炒到好有「鑊氣」，食落特別香口。啲飯粒粒分明，睇落有少少油潤光澤，飯粒帶少少煙韌口感，加埋蛋香、蔥香同醬香一齊爆出嚟，味道好夾。配料份量都啱啱好，唔會搶晒飯香，簡單好味。

小食有香脆地瓜球、黃金起司熱狗、珍珠奶茶。

最後一檔見到滾筒式碳烤雞小排，雞排燒得幾靚，表面仲有層好吸引嘅焦香，外面有少少脆口，肉汁鎖得幾好，醬汁鹹鹹甜甜好惹味，雞肉嫩滑多汁，陣陣炭烤香。

由街頭掃到街尾，買番酒店慢慢食，超滿足。