すき家
馬鞍山 29/12/2024 19:00
蘑菇多蜜醬牛丼 L $48
日本大連鎖品牌。外賣都非常高質，今期限定蘑菇多蜜醬牛丼。熱辣辣嘅白飯鋪上牛肉薄片，再加蘑菇及特製蜜醬。牛肉薄片品質唔錯，肥瘦適中。牛肉充分吸收醬料甜鹹香氣，入味又柔軟，仲有非常多洋蔥，多一份香甜。搭配的蘑菇多蜜醬有蜜糖甜味加上松露香，非常惹味，好適合撈飯。面層仲加左超多芝士，多一份濃郁芝士咸香味，整體配合得非常之好。
KFC
馬鞍山 29/12/2024 18:00
蒜蓉包脆雞大大件，本身炸雞帶輕微辣味，充滿肉汁，外皮脆脆的，再掃上一層蒜蓉味醬料，蒜蓉味好香，甜甜地，微辣。
意大利芝士蛋糕葡撻外皮酥脆，層有類似棉花糖的，中間有蛋糕，加咗咖啡，配合蛋撻味道不錯。
緊張仲有薯蓉、汽水非常豐富。
丼丼屋
馬鞍山廣場 29/12/2024 12:00
和牛牛肋粒丼定食 $88
牛五花鍋物定食 $88
吉列炸蝦兒童餐 $75
馬鞍山廣場 6/9/2024 12:00
今日打風多一日假期，帶小朋友嚟丼丼屋。而家兒童餐$75進化咗賣相不錯。有炸蝦、香腸，蛋奄列、烏冬變得細細碗，仲有一個乳酪同埋飲品，整體味道不錯。
咖喱滑蛋同唐揚雞丼$65：炸雞大大件炸得香脆，咖喱本身甜甜的日式口味，撈飯不錯。
南蠻雞溫泉玉子丼 $48 ：呢個竟然有五大件炸雞，炸粉本身有味，炸雞啖啖肉好多肉汁，仲有一隻半熟蛋。加$12套餐包括麵豉湯小食同飲品，非常抵食。
US Prime 牛排家
萬象前海 26/12/2024 12:30
早前在點評網上訂位，仲可以預約慶祝活動，送佈置及小甜品。入座已經充滿驚喜，偏廳裝修相當靚，靠邊梳化位非常闊落，檯面放滿慶祝紀念品嘅擺設，儀式感滿滿。
今日剛好是國內工作日買到平日午市商務套餐，扣除優惠，平均每份178元。每份包括餐前麵包、主菜、小吃兩款，非常抵食。
蔓越莓核核面包，麵包暖暖地幾鬆軟，有粒粒莓乾帶酸甜，好開胃，仲可以可以任添。
熟成M3肉眼牛排、熟成M3雪花牛排﹕兩份牛排上菜時即聞到陣陣香氣，牛排面可見油份滋滋，非常吸引。選擇左七成熟，用刀輕輕切開，熟成度剛剛好，外層稍微焦脆，中間見到完美嘅粉紅色澤，亦充滿肉汁。入口一刻，爆出豐富嘅油脂，濃郁嘅牛肉香味，肉質非常柔嫩。
法式香草蝸牛﹕好耐未試過咁好食嘅田螺。田螺味道甜甜，加上厚厚一層又綿密嘅薯蓉，仲有濃郁芝士，加上黃油豐富，整體配合得非常好。
黑松露芝士薯條﹕薯條新鮮香脆，中間軟腍，灑上黑松露粉，多一陣香氣。
碳烤混合風味香腸﹕香腸配上薯蓉係小朋友最鍾意嘅菜式。香腸都係高質素，腸衣香脆中間肉汁爆晒出黎。
黑松露牛肉粒炒飯﹕細細碟炒飯估唔到係人氣名菜，的確非常好食，炒飯粒粒分明夠乾身，牛肉粒非常多，牛味豐富又夠腍，拍得住主菜牛肉嘅質素。
最後送上紀念日甜品，一個心型士多啤梨慕絲蛋糕，又靚又好味。
今日的確相當滿意，無論是餐廳環境，食物質素都相當高，而且服務亦非常好，整體極具高級感，非常享受。埋單只係$400左右，超過抵。
木屋燒烤
美團外賣 26/12/224 19:00
外賣打包非常好心，暖袋之內仲放左兩個暖包，返到屋企暖笠笠。
招牌單人餐 60元：選擇咗不辣口味，有本身嘅孜然香。肥牛、雞腿肉都幾腍滑、台灣香腸腸衣脆中間香甜有肉汁、烤海米芸豆包子、魚豆腐爽口彈牙味道香。雞脆骨食得出脆卜卜軟骨，仲有鴨掌。
烤羊肉串 30元：揀咗辣味真係辣到黐咗線，還好食得出有羊味。
電白乾魷炒米粉 20元：炒得幾乾身，有一啲魷魚乾提味。
味道是不錯的，但係的確新鮮會好食好多。
Ole Bakery
深圳睿印廣場 26/12/2024 18:30
小蜜蜂蛋糕 29.9元
非常鬆軟，好香甜，滿滿蜜糖味。
