Harry Potter Butterbeer
30/4/2025 19:00
雀巢推出嘅 Harry Potter 奶油啤酒味甜筒雪糕真驚喜。包裝靚。啖啖濃郁嘅奶香同焦糖甜氣，再滲出一絲啤酒清香，非常柔和且富層次。雪糕頂部鋪滿金黃糖脆粒，輕脆爽口。甜筒夠新解鬆脆，脆筒內係朱古力層，加甜。
瀘溪河
深圳上梅林卓悅匯 27/4/2025 17:00
估唔到呢一大袋十二個老雞蛋糕，只需要10.4元，係大大個直徑起碼8cm嘅雞蛋蛋糕。蛋味、牛油味都算幾香，口感鬆軟，非常不錯。
深圳萬象天地 13/4/2025 14:00
黃油年糕 14.9元
賣相不錯，每粒都脹卜卜。外皮脆脆脆的，中間年糕非常厚身，口感煙靭黏糯，米香味濃，而且唔算油膩，非常好食。
深圳卓悅中心 15/5/2024 17:30
今期推介龍井口味，點評買龍井麻糬優惠3.99元有一少袋。麻糬口感煙韌，茶味相當香濃，中間仲有幾粒紅豆加甜味，不錯。
下午茶套餐15元x2份﹕每份下午茶有兩件海苔小貝加兩個焗烤千層撻，相當抵食。小貝肉鬆都算幾多，蛋糕唔算太腍，醬汁唔算太多，但總算幾平衡。千層撻皮幾鬆化，油香味濃，蛋漿蛋味濃郁，整體不錯。
深圳萬象天地 3/9/2023
蔥油味一口桃酥9.9元
見特價冇睇清楚就買，以為係平時嘅甜桃蘇，點知原來係香蔥鹹味。入口非常鬆化，鹹香味十足，蔥香美濃，非常驚喜。
深圳卓悅匯 27/8/2023 18:00
海鹽芝士爆漿麻糬 點評優惠20元 細細粒，一口一粒，我落去真係要爆漿，忌廉芝士唧晒出嚟，芝士味濃郁，忍唔住一粒接一粒。
生椰貝貝 點評優惠16元
一盒四個，外皮係椰絲，中間蛋糕夾忌廉，有椰果啫喱，椰味香濃不太甜。
綠豆冰糕 點評優惠9元 可愛造型，凍冰冰，味道香甜，入口即溶，有綠豆味。
松松小貝 點評優惠16元
一盒六個，表面舖滿海苔肉鬆肉，肉鬆較為腍身，蛋糕入口比較實淨，中間有唔少蛋黃醬，整體來說可以，但明顯鮑師傅好好多。
浙里薈
深圳紅山 27/4/2025 11:00
今次抽中0元探店4人浙江菜餐，實在非常抵! 就係紅山6979較遠嘅其中一棟，位置都幾好搵。餐廳佈置清雅，座位舒適。
前菜焦糖合桃味道香甜。
冰鎮小番茄﹕鮮紅小番茄晶瑩剔透，輕輕咬開，鮮甜果汁瞬間爆發。小番茄吸收晒話梅嘅精華，甜蜜中帶話梅嘅甘甜酸鹹味，解膩又清爽，非常驚喜。
話梅小排﹕清香嘅話梅同鮮嫩嘅小排融合，話梅帶淡酸甜，滲透到每一塊排骨入面，咬落有股清新嘅梅香，醬汁醇厚甜美，食得出話梅嘅甘香。可惜小排比較細粒，經過稍炸肉質更為硬實。
南宋叫花雞﹕用荷葉包裹焗製方式，保留住雞肉嘅原汁原味，亦聞到陣陣荷葉嘅清香。雞皮色澤金黃油亮，尚算嫩滑，汁就唔算太多。雞肉充分吸收左調味，食落有味。
雞湯海鮮豆腐﹕豆腐同雞湯完美結合，湯頭濃郁得嚟又帶清甜，入口時仲滲著淡淡嘅膠質感，細膩絲滑。豆腐嫩滑，入口即化，吸收晒濃湯精華，加上好多鮮甜嘅蝦仁同魚肉，送飯實在一流。
傳統腌篤鮮﹕無論係湯頭定係餸料，都散發住鄉土親切味道。湯頭有濃郁金華火腿香氣，精華全部融入湯裏面，厚重而鮮甜。材料仲有百葉豆皮吸取收晒湯汁，加上鮮嫩嘅竹筍同瓜菜，非常清爽。
豆花﹕打卡贈送豆花，入口即化，順滑程度一流，桂花蜜帶有嘅花香清柔甜美。
窩子
新蒲崗 27/4/2025 18:00
慢煮手撕豬腩窩夫三文治 $116
新蒲崗人氣餐廳「窩子」嘅特色菜之一，單係睇賣相已經夠吸睛，實在太澎湃，材料勁豐富。金黃酥脆嘅窩夫係底部主角，邊緣輕微帶焦，散發牛油同蛋香，上面放上新鮮生菜同番茄外，再鋪滿手撕豬腩肉，加上一片烤得微焦嘅芝士，份量十足! 豬腩肉絲香嫩，煮得夠晒入味，味道酸酸甜甜，非常開胃。配搭嘅窩夫焗至金黃，中間非常鬆軟帶韌性，可惜蛋味略為不足。但確實有驚喜。
日式海鮮大阪燒酥皮薄餅 $188
賣相實在吸引，材料多到滿瀉。以日式大阪燒加上酥皮做成薄餅，的確有創意。直徑足足8寸酥皮，底層嘅酥皮薄餅脆到不得了，入口時酥香滿溢。薄餅材料呈現大阪燒嘅元素，滿滿嘅海鮮如魷魚仔、帶子粒同蜆肉，相當足料，一絲絲嘅紅生薑係日和風味來源。加上濃郁香甜嘅大阪燒醬同蛋黃醬，仲有會舞動嘅柴魚片，脆口紫菜碎，確確實實嘅大阪燒! 可惜酥皮同海鮮有啲分離散碎，食起來比較狼狽。
三重朱古力麻糬窩夫配朱古力雪糕 $84
呢款甜品絕對能得到朱古力魔歡心。窩夫外層烤得輕脆焦香，但中間原來隱藏住勁煙韌嘅麻糬，唔單止勁有韌度，仲有濃郁嘅朱古力香。窩夫上灑滿Oreo碎同大量朱古力醬，仲有大大個朱古力雪糕。雪糕除左朱古力仲食到棉花糖同果仁，應該係類似石板街嘅口味。用朱古力脆卷沾雪糕黎食，充滿童年回憶。
抹茶士多啤梨法式千層酥配士多啤梨雪糕 $82
千層酥上唧滿奶油，仲有大大粒士多啤梨點綴，糖霜灑喺酥皮上，高貴又精緻。輕輕切開酥皮，原來內藏抹茶醬。酥皮輕盈鬆化，牛油味香，酥而不膩。抹茶質感絲滑，帶著一絲甘苦，士多啤梨又新鮮又夠甜，多一份清爽。配搭嘅士多啤梨雪糕味道香濃，有天然嘅果香，不錯。
朱古力鮮奶咖啡 $44
有靚靚嘅拉花，表面可以見到輕柔嘅泡沫。咖啡嘅香氣散發出來，味道香純，加入牛奶令整體口感更加順滑，奶香味過後就飲得出微甜嘅朱古力味，平衡咖啡嘅苦味，品質相當高。
係舊區難得一見可以歇腳放鬆嘅小店，餐廳內放滿玩具、舊物，連枱椅都係舊時學校嘅產品，玩味十足。一班年青店員親切有禮，手法專業。食物有創意，賣相精緻吸睛，味道仲相當不錯。不錯的窩。
泰中意
大圍田心村 26/4/2025 14:00
蔥油炭燒豬扒飯 $110
相信係小店嘅招牌菜之一：巨人蔥油炭燒豬扒飯。一上枱已經聞到陣陣嘅香茅香氣，豬扒簡直係巨量，兩大塊巨型嘅炭燒豬扒擺放喺雪白嘅香軟白飯上。炭火燒烤，表面烤得金黃微焦，油脂豐富。外層仍然保留香脆口感，豬扒中間嫩滑多汁，非常好味。再加上蔥油，加一份咸香味，送飯一流。
泰式雞絲濕炒河 $95
河粉上鋪滿雞絲，份量多到不得了。雞絲都幾嫩滑，啖啖肉，感覺好爽。河粉非常幼滑，煮到啱啱好。幾喜歡濕炒嘅做法帶多點醬汁，河粉吸收晒個醬汁。仲加上大量蔬菜，非常健康。
泰式拼盤 $128
將多款經典泰式小吃集於一碟，材料豐富，賣相非常吸引。香葉包雞雞肉嫩滑，滲出淡淡香葉香氣。蝦餅外層香脆，內裡蝦肉餡爽口彈牙，食得出的新鮮。魚餅有豐富魚肉鮮味，加上香茅同咖喱等香料作點綴，微辣度非常好味。雞翼煎得金黃微焦，調味鹹。素菜春卷香脆可口，餡料豐富。咁多款香口小食，一定要加一點酸辣醬，酸酸甜甜，非常好味。
餐廳雖然規模唔算大，裝潢簡約清新，充滿着泰式情懷。非常鍾意呢種家庭式嘅小店，氣氛輕鬆自在，份量十足，價錢又親民。
2025珠海長隆海洋王國［2.3 玩樂下半場、口岸天地］
21/4/2025 14:00
自助餐後玩埋最後下午場。
14:15 5D城堡影院﹕畫面、音效、風水特效做得非常好，故事無冷場，小朋友都鍾意。
15:00 隱藏遊戲搵閃卡最後衝刺，最後每位小朋友都拎到超過十張卡，換到襟章同拼圖，收穫滿滿。
15:45 離開園區，坐滴滴去珠海口岸，遇上少許塞車，17:00到達口岸，預留時間逛逛新開嘅口岸天地。商場有幾層都唔細，但係十室九空，唔算多舖頭，而且無乜人氣。有幾間較大型賣澳門手信店，仲有間Miniso睇下。人流唔多，所以最後唔打算係度食下午茶。
17:45 開始離境程序，幸好商場旁邊已有大門入到關口大樓，見另一邊剛剛有旅遊巴落客已經打晒蛇餅。入到大樓其實唔算多人，十分鐘唔洗已經過晒關，之後就搵番環島中港通回程。今次揀左由關口出發到大圍，原來價錢平好多，成人車票$120，最抵係有小童優惠票$70。其實都係客滿即開，所以距離原本買票時間仲早，都可以照上車提早離開。
18:30 到達香港關口，始終合併澳門回港嘅人流，人比較多，但都係十分鐘已成功過到人工通道。
19:10 去中港通巴士總站上新界線直通，直到大圍火車站落車。
20:20 返到馬鞍山，旅程結束。今行無論係園區內、酒店、餐廳都不停收到唔同禮物，收穫滿滿，小朋友最開心。
