Archives | Let's Eat Out

韓樂

by admin | 5 月 31, 2025 | 小食, 韓國菜, 馬鞍山, 麵食

馬鞍山 31/5/2025 18:00

下午茶時間份量都相當足夠。

韓式芝麻燒汁焗雞扒飯 $43﹕上枱見到成層金黃芝士，仲有啲芝麻灑面，非常吸引。芝士拉絲夠曬誇張，芝士控見到都開心。白飯索曬個韓式燒汁，食落甜甜地又有少少辣味。雞扒都幾大塊，焗完外皮有啲脆，入面又嫩又多汁，非常滋味。

輕量野菌豚肉炒讚岐烏冬 $49﹕啲烏冬炒到條條分明，掛住亮晶晶嘅醬油色，加埋色彩繽紛嘅三色椒同埋啡色嘅野菌，賣相相當唔錯，夠晒鑊氣。讚岐烏冬口感煙韌彈牙，醬汁調得啱啱好，鹹中帶甜，仲有淡淡嘅菇菌香氣。豚肉片份量十足，肉質嫩滑，加埋爽口嘅燈籠椒絲，非常惹味。

香蒜炸雞 $23﹕炸雞件件都金黃香脆，口感香脆，外皮乾爽唔油膩，入面嘅雞肉竟然仲可以鎖住肉汁，又滑又嫩。調味蒜味勁香，入晒味，鹹香惹味。

馬鞍山 15/11/2024 12:00

韓式牛肉炒粉絲 $67﹕炒粉絲口感彈牙，夠煙韌，每一條都吸收晒濃郁嘅醬汁，甜甜地，仲滲透咗少少芝麻香。配料有爽口嘅紅蘿蔔絲、香甜嘅洋蔥、同埋大量嘅椰菜同牛肉，每一口都係味道同口感嘅完美融合！仲有必不可少嘅芝麻同蔥絲灑喺頂層，多咗層層次感又更香口！

雞扒粟米石頭鍋珍珠飯$68﹕一上枱就即刻被「滋滋聲」吸引，石鍋熱力令飯底煎到金黃香脆，仲有鍋巴。雞扒煎得恰到好處，皮脆肉嫩，都幾juicy。配料加上好多超甜粟米同青蔥，加埋濃甜嘅特製醬汁，令整鍋飯層次感即刻升級，最正係用匙羹喺石鍋度刮啲脆香嘅飯底，超滿足！

馬鞍山 15/9/2024 18:00

雞扒粟米石頭鍋珍珠飯 $68

熱辣辣，雞扒相當大塊，頭鍋珍珠飯材料都好豐富，除咗有大量嘅粟米，仲有好多紫菜，芽菜泡菜等等。另外可以按個人喜好加上甜醬油或者辣醬油。

韓式牛肉炒粉絲 $67

材料非常豐富，牛肉大大片，仲有好多蔬菜同埋冬菇，炒得幾香。

魔鬼芝士焗香腸 $38

非常邪惡嘅一個小食，香腸脆皮肉汁豐富，芝士非常濃郁。

吉野家

by admin | 5 月 31, 2025 | BB Friendly, 日式料理, 馬鞍山

馬鞍山 31/5/20225 11:00

再次來食個豐富早餐，呢個早餐真係幾抵食。又豐富又夠飽，朝早食完即刻叉足電！

吉野家早餐和風牛肉出前一丁配炒蛋香腸、麵豉湯$39﹕呢個早餐組合真係冇得彈！個炒蛋真係炒得好滑，入口即溶融，味道啱啱好，唔會太鹹。條香腸就係我哋平時食開嗰種雞肉腸，鹹香惹味。碗麵豉湯就算係粉開嘅都唔馬虎，飲落覺得啲味噌味幾濃，仲有幾塊海帶喺入面，算係交足功課。和風牛肉出前一丁啦牛肉切到薄一薄，啲和風燒汁味勁香，甜甜鹹鹹咁，連啲洋蔥都煮到好腍、勁清甜。個出前一丁煮到夠晒彈牙，索晒啲牛肉汁精華，超正！

馬鞍山 30/3/2025 11:00

吉野家早餐和風牛肉出前一丁配炒蛋香腸、麵豉湯$39

金黃炒蛋、烤香腸、牛肉片出前一丁，加上一碗熱騰騰的麵豉湯，呢個絕對係最佳早餐配搭。和風牛肉出前一丁無疑是呢份早餐嘅主角，薄切牛肉片，濃郁照燒香氣，牛肉質地嫩滑，調味恰到好處，甜鹹平衡，和風醬汁嘅甘甜同牛肉本身好夾，洋蔥都煮得軟腍，超級清甜。出前一丁保持彈牙口感，充分吸收左牛肉汁精華。炒蛋呈現出蓬鬆柔軟嘅質地，入口即化，炒蛋調味清淡，恰好能夠中和牛肉醬汁嘅濃郁。香腸係最傳統嘅雞肉腸，內裡卻依然保持多汁，咸咸香香。麵豉湯雖然係開粉，但味噌更醇厚，加上仲有幾片海帶，可算誠意十足。從性價比角度考量，這份早餐套餐價格相當合理。夠豐富、夠飽足。

馬鞍山 20/10/2024 11:00

馬鞍山新港城呢間「吉會線」小火車送餐，小朋友睇得好開心。

吉野家早餐和風牛肉出前一丁配炒蛋香腸、麵豉湯$39

牛肉腍滑入味，洋蔥夠多，配出前一丁味道不錯。炒蛋幾滑，香腸皮脆。早餐相當飽肚。

照燒雞扒出前一丁早餐$39: 雞扒略為實淨，但燒汁甜甜的，味道不錯。

加配炸黃金鱈魚卷、炸特色魚板，兩串只需$6，抵食，魚肉厚實，味道不錯，口感彈牙，抵食。

馬鞍山 11/10/2024 11:00

早餐份量唔少，絕對食得飽人。賣相不錯。

和風牛肉丼 $31﹕吉野家牛丼嘅早餐套餐唔單價錢親民，仲有多種搭配可以選擇。牛丼嘅牛肉薄切，每片浸滿咗特製醬汁，入口即溶，咸甜適中嘅醬汁帶有淡淡醬香同洋蔥嘅甜味，非常醒胃。配搭底層嘅熱白飯，吸收咗牛肉醬汁嗰陣濃郁味道，每口都令人感到滿足。從質感上睇，牛肉片嘅質地柔軟而帶少少韌度。再加上一碗熱騰騰嘅味噌湯，發出濃濃豆香氣味，令人感到溫暖。

野菜煎雞檔丼 $29﹕燒汁雞肉飯色澤明亮，金黃色嘅雞肉加上燒汁，上面撒少許蔥花點綴，每件雞肉都經過細心醬汁腌製，入口嫩滑，帶有輕輕嘅焦香。燒汁嘅鹹甜比例非常恰到好處，連埋底層嘅白飯都充分吸收咗醬汁精華。白飯鋪排均勻，每一口都能沾上燒汁，點綴上色彩分明嘅蔬菜更加吸引。

加配炒滑蛋同腸仔 $5

加配炸黃金鱈魚卷$6 、炸特色魚板$6﹕炸魚板串色澤誘人，每串都有均勻嘅金黃色澤，而且份量啱啱好。魚板內裏鮮味十足，每啖都有濃厚嘅海鮮味道，口感彈牙，每啖都感受到啱啱好嘅 Q 彈效果。

京萬聚北京烤鴨

by admin | 5 月 25, 2025 | 中菜, 外賣, 小食, 深圳, 燒烤

美團外賣 25/5/2025 18:00

北京片皮烤鴨套餐配可樂 85元

包裝企理，一隻鴨份量都多。鴨皮呈現出油亮誘人嘅光澤，薄而不膩，食得出酥脆嘅口感，並伴隨著豐厚嘅油脂，香氣四溢。鴨肉肉質柔嫩多汁，有鴨肉天然嘅鮮甜味道，脂肪與瘦肉比例適中，肉質嫩滑，又唔會太過油膩。再搭配薄薄嘅荷葉餅、清脆爽嘅蔥絲同捕瓜條，再按個人喜好加入鹹鹹甜甜嘅甜麵醬。將所有配料堆疊入口感覺非常豐富滿足。

廣隆蛋撻王

by admin | 5 月 25, 2025 | 外賣, 深圳, 港式, 甜品, 麵包

深圳中洲灣 25/5/2025 17:30

可可髒髒撻 @6元

與傳統金黃色蛋撻截然不同，髒髒撻表面撒滿濃郁嘅可可粉，營造出「髒髒」嘅視覺效果，呢種「凌亂」嘅狀態正係髒髒系列甜品嘅魅力所在。塔皮酥脆的，層次分明，酥脆不油膩。中間係傳統嘅蛋漿，甜度適中，口感都算幼滑，加上濃郁嘅朱古力香氣，可可微苦，微苦回甘，算不錯。

芝士麻糬波 9.9元

每一粒都呈現完美嘅球狀，大小適中，可以一口一個。表面光滑，賣相算不錯。波波質地柔軟，外層皮薄而有韌性，獨特嘅Q彈口感。中間嘅芝士味慢慢釋放出，奶香濃郁，咸咸甜甜，調味恰到好處。

SOCIALS Brunch 餐酒館

by admin | 5 月 25, 2025 | 小食, 深圳, 甜品, 西餐, 飲品

深圳中洲灣 25/5/2025 16:30

雙人下午茶套餐 94

藤椒鹽酥雞﹕藤椒鹽酥雞使用左四川藤椒呢種獨特嘅香料，散發出特有嘅麻香與鮮香。酥雞外皮金黃酥脆，炸粉薄薄，口感輕盈不油膩，而中間鮮嫩多汁，香料味道完全滲入雞肉之中，辛辣感適中，啖啖川式風味。

美式炸薯條﹕薯條新鮮即炸，熱辣辣，外層酥脆口感，中間綿密，薯味天然香濃。

熱香餅配香草冰淇﹕甜品吸睛十足，金黃色嘅熱香餅疊得整整齊齊，頂部放上一球純白香草冰淇淋，再灑上糖霜，周邊仲加上唔少新鮮水果同堅果，整體色彩和諧又清新。上枱時熱香餅仲暖笠笠，溫度同雪糕冰涼完美結合，雪糕喺熱香餅上慢慢融化。熱香餅本身有好多奶香同蛋香，甜味適中，口感鬆軟。雪糕冰感十足，香草奶香味濃，夾埋一齊食來一個冰熱，清新和諧。水果清甜，堅果香脆，不錯。

生椰拿鐵﹕透明杯裝下見到咖啡同白色嘅椰奶漸變層，靚。，咖啡的微苦與椰奶的棉柔香甜，味道平衡，椰奶輕盈滑順。