by admin 7 月 28, 2025 | Blog , 尖沙咀 , 樓上cafe , 甜品 , 西餐
尖沙咀 28/7/2025 13:00
Bookmark左呢間尖沙咀超多好評嘅西餐好耐，到暑假真係有時間同老公拍拖仔。距離尖沙咀地鐵站不遠處，一座Service Apartment樓上，所以環境更加清靜。餐廳佈置簡潔但高格調，非常舒適。特登揀午餐來，因為套餐相當抵食。Lunch Menu 本身已包括餐湯同及汽水。份量唔算太多，想試多款，所以叫左三個餐。
是日餐湯係蘑菇湯，有顆粒感，真材實材。菇菌味香濃，亦帶奶香，不錯。
M4+澳洲和牛脊肉配薯條 $218﹕賣相精緻，M4+屬於優質和牛級別。牛肉嘅熟度控制精准，要求嘅五成熟都做到，牛肉仍帶粉紅色，可見細密嘅紋路。牛脊肉真係非常柔嫩，濃郁嘅牛肉香氣，既濃厚又唔覺油膩，而且非常多汁。薯條炸得外酥內軟。
燒烤醬燴羊膝配焗薯蓉 $188﹕非常澎湃，份量十足，一隻羊膝呈現眼前。羊膝燉煮到肉質非常嫰，好輕易就可以用叉子𠝹開。每啖都食到羊肉天然嘅味道，而且肉汁豐富。搭配燒烤醬入晒味，甜咸平衡得恰到好處，仲帶少許煙燻氣息。薯蓉超級滑，入口即化，薯味香濃。兩煮非常調和，滿足!
脆皮豬腩件珍珠麵配日式洋蔥汁 $98﹕擺盤賣相實在太靚，估唔到平平無其嘅豬腩肉都可以升級到呢個格調。幾件豬腩整齊排列，金黃酥脆嘅脆皮、肥瘦相間嘅豬肉大巴士實在太吸引。成件事嘅重點一定係脆到索一聲嘅脆皮，而肉質係非常嫩滑多汁，油份適中，毫無油膩嘅負擔。日式洋蔥汁絕對係靈魂所在，洋蔥煮得透，本身洋蔥嘅清甜味加上日式醬汁嘅香甜，以及芝士碎嘅咸香，同豬腩肉好配合，幾片帶酸味嘅醬菜讓菜色更加清爽，襯托出豬腩嘅濃厚鮮甜，完美收筆。珍珠麵圓圓細細粒，口感彈牙，用墨魚汁炒過，帶海洋咸香味，為餐點結尾留下飽足感。
by admin 7 月 27, 2025 | 外賣 , 小食 , 深圳 , 燒烤 , 西餐
深圳歡樂海岸 27/7/2025 19:00
芝士忌廉薯蓉 15元：上面鋪咗層厚厚嘅芝士，拉絲效果超誇張，薯蓉混合咗大量忌廉，入口極之綿密幼滑，完全食唔到顆粒感。奶香味同芝士嘅鹹香完美融合。
經典意式脆皮烤雞 57元：烤雞切件份量唔多，皮薄醃得入味，有多種意式香草嘅味道，可惜雞肉偏乾身。
芝士雞肉培根比薩 28元：呢個Pizza反而有驚喜，薄底批邊焗得脆卜卜，餅皮好似餅乾咁，餡料方面好足料，每一啖都咬到雞肉粒同培根，加上大量嘅Mozzarella芝士，鹹香惹味。
by admin 7 月 27, 2025 | 中菜 , 兒童餐 , 小食 , 深圳 , 親子餐廳 , 點心
深圳歡樂海岸 27/7/2025 17:00
公主生日去西貝慶祝。
親子套餐 124元
兒童餐份量對於小朋友嚟講啱啱好。蘑菇湯莜面魚魚蘑菇湯粉，小朋友鍾意食嘅粉仔。仲有一份細細個嘅雜糧漢堡，麵包軟熟，入面塊漢堡扒雖然細，但肉味都幾足，加埋番茄醬，酸酸甜甜好開胃。仲有水果，甜品，酸奶等。
土豆胡蘿蔔小鍋牛腩﹕騰騰小鍋上枱，入面嘅材料好豐富，大大嚿嘅牛腩、土豆同胡蘿蔔。牛腩炆得好腍，用筷子輕輕一夾就分得開，肉質軟嫩得嚟又帶少少筋，好有口感。土豆同胡蘿蔔都吸收晒啲肉汁精華，煮到又腍又入味，用嚟撈飯簡直係一流。
羊肉小餃 45元﹕水餃隻隻都好飽滿，皮好煙韌，唔會太厚或者太腍，羊肉味好濃郁，肉汁豐富，真材實料，味道濃郁但又恰到好處。
生日麵一碗蕃茄湯底闊條麵，有蛋有菜賣相幾靚。最驚喜嘅係生日環節。啲店員會圍埋一齊唱生日歌，氣氛超級高漲，仲有魔術表演，又有禮物，小朋友超級開心。
by admin 7 月 27, 2025 | Uncategorized
深圳中洲灣 27/7/2025 13:00
芝士巧古力牛奶冰28元﹕一上枱賣相已經好吸引，深啡色嘅朱古力冰堆到成座山咁高，再淋上滿滿嘅鹽味奶蓋，視覺上已經贏晒。冰底口感真係好綿密，打得好細，入口即溶，完全唔會有碎冰粒嘅感覺，牛奶味香濃。中間有大量朱古力粉，爆珠等，味道濃郁。上面鹽味奶蓋帶咸香，朱古力雪糕又夠濃味，整體配合得宜。
by admin 7 月 27, 2025 | Uncategorized
深圳下沙 27/7/2025 12:00
點評抽中韓國燒烤二人餐。
配菜方面，韓國燒烤必備嘅泡菜、醃蘿蔔、韓式涼拌菜都一應俱全，生菜又新鮮，仲可以無限續添。服務員全程幫燒，服務還好。
香橙安格斯牛肋條係將牛肋條同清新嘅香橙完美結合。牛肋條油花分佈均勻，肉質嫩滑有咬勁，香橙帶有自然嘅酸甜味，為濃郁嘅牛肉增添咗一份清新感。
厚切五花肉肉質嫩滑，油脂分佈均勻，煎烤後外脆內嫩，搭配韓式醬料更好味。炭燒雞腿肉醬汁味道香濃，口感嫩滑。
即場煎嘅焦糖紅薯片，番薯甜甜的，加上砂糖泡到味焦，好味。
海靈菇炒飯係一道簡單又好味。炒飯粒粒分明。海靈菇香氣完全釋放，再加入其他配料，例如雞蛋、青豆、紅蘿蔔粒或者粟米粒，令炒飯更加豐富多彩。。
by admin 7 月 27, 2025 | 外賣 , 深圳 , 甜品
深圳KKOne 27/72025 12:30
大米味雪糕 13.9元﹕佢個樣簡簡單單，純白色，望落好似普通牛奶雪糕，但一食落口就完全唔同。陣陣米香味好突出，清甜得嚟又唔會太膩。本身雪糕好黏口滑溜，再加上有細細嘅米粒，味道更有層次。成個感覺好天然，好真材實料，又夠清新。價錢唔平，所以有特價即刻試。
