中心書城 31/8/2025 18:00
霸氣叉燒香菜腸 21.9元﹕個樣睇落已經好吸引，皮薄到可以透光，隱約見到入面嘅餡料。腸粉皮食落有好香嘅米味，口感超級嫩滑，幾乎入口即化，配埋甜豉油真係一絕。叉燒切得好細粒，肥瘦適中，同滑溜嘅腸粉一齊食，口感豐富。
牛肉香菜腸粉 18.8元﹕味道都唔錯，牛肉好新鮮，夠嫩滑，香菜味平衡。
脆皮餃 5元，炸到金黃香脆，入面嘅豬肉餡多汁，味道調得啱啱好，點少少醋食更加開胃。
香草魚餅 6元﹕口感彈牙，魚味帶微辣。
金湯酸菜魚 27元﹕份量足，一上枱就聞到好香嘅酸辣味。魚片都算幾滑又冇骨，索晒啲湯汁，非常入味。個湯底酸度同辣度平衡得好好，唔會太刺激，不過都係一般出品，不及專門店。
深圳中心書城 31/8/2025 17:00
點評探店套餐 – 寶藏紅燒牛肉麵配百香茉茉綠茶
招牌紅燒牛肉麵熱辣辣，賣相相當吸引，材料豐富，牛肉舖滿麵之上。湯底濃郁，有醬油嘅鮮香、八角同桂皮嘅香料味，帶輕微辣度，不錯。牛肉大大件，有牛腩同牛筋，都燉得軟腍腍，煮到入晒味，紅燒汁完全滲透到肉質入面，肉味濃郁，膠質豐富。麵條係較粗嘅手工麵，煮得恰到好處，煙韌有彈性，仲非常掛湯。配料仲有蘿蔔，吸收晒湯汁嘅精華，半隻蛋都相當入味。
領展中心城 31/8/2025 14:00
打卡免費，收穫滿滿！一打開包裝，就聞到一股淡淡嘅花香味，好清新。個餅皮係金黃色嘅，賣相幾精緻。咬落去第一啖，餅皮好酥脆，有少少似老婆餅嘅口感，但更加鬆化。最驚喜嘅係個餡料，真係食到一絲絲嘅玫瑰花瓣，口感好軟糯，甜度啱啱好，完全唔會覺得膩，入口仲留住淡淡嘅花香，令人回味無窮。
深圳KKOne 31/8/2025 13:00
橙V•鰻魚甄選2人餐 168元
韓式小菜無限任添，泡菜同埋南瓜蓉非常好食。
烤鰻魚足足有一條，份量超多，肉質厚實飽滿，油脂豐富，醬料夠香，加上紫菜超級好食。
肉類有幾款，秘製護心肉、精選五花肉、原切肥牛。秘製護心肉肉質細嫩且帶有適度嘅油脂，燒烤到外層微焦，帶有一絲嚼勁。精選五花肉肥瘦，口感爽口，原味燒烤食得出豬肉自然香氣。原切肥牛片薄且均勻，肉質鮮嫩，入口滑嫩。地瓜片加上砂糖燒烤清甜香脆。
炸雞塊份量足，外皮炸得香脆，中間肉質豐富，調味鹹香，非常好食。
新開張送兩杯清爽檸檬茶，呢個份量實在太滿足！
深圳領展中心城 31/8/2025 12:00
絹豆腐奶茶 12元：行開見到間台式飲品店出咗兩款好特別嘅特飲，分別係絹豆腐奶茶同開心果豆腐奶茶。奶茶底層沉澱住一層白色嘅絹豆腐，賣相幾吸引。飲落第一啖，奶茶味香濃，甜度適中，唔會太膩。最正嘅係啲絹豆腐，口感順滑，同奶茶嘅味道好夾。
開心果豆腐奶茶 16元：呢杯嘅奶茶底帶有淡淡嘅開心果香味，顏色呈現淺綠色，開心果味同奶茶味融合得好好，飲落去有種堅果嘅甘香，甜度比絹豆腐奶茶低少少。配埋同樣嫩滑嘅豆腐，味道好有驚喜，非常特別。
何文田 30/8/2025 14:00
行開旺角，見到有間餅店新出咗款開心果燒餅，即刻買個嚟試下。燒餅拎上手熱辣辣，圓碌碌脹卜卜。表面烘到金黃色，仲有開心果碎。個皮真係超級煙韌，入面嘅開心果餡多到滿瀉，味道唔會太甜，味道勁濃郁，係好實在嘅開心果原味，仲食到啲開心果碎粒，鹹香味夾得啱啱好，完全冇互搶味道。
