領展中心城 28/9/2025 19:00
今次外賣粵菜點心，幾款味道都唔錯。
XO醬炒蘿蔔糕 28元﹕份量算多，有好香嘅XO醬海鮮味。蘿蔔糕切成正方細粒，外層煎到金黃焦脆，均勻咁沾滿咗XO醬同豆芽、韭菜等配料。蘿蔔糕本身都幾清甜，仲有蘿蔔絲實在質感。XO醬帶微辣同鹹香，仲幾有鑊氣。
牛腩腸粉煲 38元﹕底層鋪滿咗滑溜嘅腸粉，上面鋪滿咗炆到入味嘅牛腩同牛筋。牛腩炆得好腍，肥瘦適中，牛筋更加係充滿膠質，入口即化。腸粉吸收晒牛腩汁嘅精華，變得非常入味，鹹中帶甜，口感滑嘟嘟，腩汁味道不錯。
排骨蒸陳村粉 36元﹕陳村粉薄薄，上面放滿咗排骨。排骨蒸得啱啱好，肉質嫩滑多汁，醬油香味滲晒入去。主角陳村粉非常薄身，口感爽滑得嚟又有米香，重點係佢好吸汁，吸晒排骨嘅肉汁同醬油味，不錯。
卓悅中心 28/9/2025 17:30
今日點咗個芝士蛋糕下午茶套餐
三味芝屋配飲品 73元﹕芝士蛋糕一上枱，賣相好精緻，三件蛋糕放埋一齊。原味芝士蛋糕係一款日式嘅巴斯克芝士蛋糕，表面有層深啡色、帶少少焦香嘅外皮，但中間就係淺黃色、睇落好軟心嘅狀態。蛋糕非常綿密軟滑，濃郁嘅芝士香味即刻喺口腔爆發，口感細膩，入口即化。芝士味非常香濃，但又唔會太過甜膩，中間嘅軟心部分帶有微微嘅濕潤感，食落好creamy。面頭嗰層焦香嘅外皮帶嚟少少甘苦味，正好可以平衡芝士嘅飽滯感，令到成件蛋糕嘅味道更有層次，食完成件都唔會覺得漏。焦糖芝士蛋糕再多一份焦糖香氣。
抹茶水牛乳﹕抹茶同水牛乳融合，牛奶更加濃稠醇厚，奶味亦都特別香濃，入口非常順滑，抹茶嘅甘香微澀同水牛乳嘅香甜完美結合，味道好有層次。抹茶味濃郁得嚟唔會蓋過奶香，甜度恰到好處。
酒香巧克力拿鐵﹕一攞上手就聞到淡淡嘅酒香，一啖飲落去，感受到嘅係朱古力嘅香醇同微苦，跟住酒嘅獨特香氣會慢慢喺口腔散發，但又唔會有嗆喉嘅酒精感，拿鐵口感幼滑。
朱古力熱香餅 $68﹕賣相非常誘人。熱香餅疊高高，餅面淋滿咗濃郁嘅朱古力醬，灑滿咗朱古力粉。熱香餅入口非常綿密鬆軟，配埋雪糕一齊食，冷熱交融嘅口感更加係一流。
深圳領展中心城 28/9/2025 18:00
鮮肉餅超級大個，份量十吹。新鮮煎好拎上手仲熱辣辣。肉餅煎得金黃香脆，包皮質地鬆軟有彈性。鬆軟嘅包皮同多汁嘅肉餡完美結合，肉餡多爆，肥瘦適中。肉餡調味適中，肉味甜，而且肉汁多到瞬間爆發，超飽肚。
深圳筍崗 28/9/2025 12:00
點評套餐109元已經有一份鰻魚，抵食！
燒好之後嘅鰻魚皮脆肉嫩，外層金黃色，咬落去有微微焦香，肉質鮮甜，配埋特製嘅醬汁，鹹中帶甜，肥美度還好。
雪花肋排肉汁豐富，入口嫩滑，牛味濃郁，完全唔需要額外嘅調味已經好好食。松板肉口感爽脆。黑胡椒香腸味道濃郁。兩隻大蝦都算新鮮。
韓式拌飯配料豐富，有蔬菜、肉碎同埋一隻半熟蛋，拌勻之後每一啖都充滿香氣。至於自製小漢堡，自己將燒好嘅肉夾埋生菜同醬料，組合成一個迷你漢堡，食落去清新又滿足。
最後一定要留肚食牛奶軟雪糕。呢個雪糕奶味超重，口感極之細滑，入口即溶。食完一餐咁重口味嘅燒肉，食返個冰凍又清甜嘅雪糕，即刻解晒膩。
深圳筍崗 28/9/2025 11:30
生椰抹茶麻薯 14.9元﹕呢杯飲品嘅外觀層次分明，杯底係一層軟糯嘅麻薯，中間係翠綠色嘅抹茶，最頂層就係純白嘅生椰乳，形成綠白相間嘅漸層效果，賣相好清新。飲之前記得要搖勻，將所有材料混合埋一齊。首先飲到嘅係冰涼順滑嘅生椰乳，椰香味濃郁。抹茶嘅甘醇茶味會慢慢滲出嚟，同椰乳嘅甜味中和得好好。麻薯煙韌軟糯，帶有淡淡嘅米香。整體甜度適中，飲落清爽得嚟又有飽足感，唔會覺得膩，口感幾豐富。
黃埔 27/9/2025 14:00
沙茶鮮牛肉刀削湯麵 $56﹕最特色係濃郁嘅沙茶湯底，味道夠晒濃郁，甜中帶鹹帶輕微辣味。牛肉片切得厚薄適中，口感嫩滑，沾滿茶醬，香氣四溢。刀削麵煙韌有嚼勁，厚度均勻，充滿彈性。湯底係呢碗麵嘅靈魂，經過長時間熬煮囓牛骨湯，牛味夠香但又唔覺油膩，好清爽。
牛筋腩刀削湯麵 $56﹕另一款揀左最經典嘅牛筋腩麵，份量超多，最鍾意牛筋非常軟糯嘅，膠質豐富。牛腩亦都好腍滑，牛味濃郁。
一碗麵加$12有一枝水果冷泡茶﹕青蘋果冷泡茶酸酸甜甜，茶底幾甘香，夠解渴。另一款白桃冷泡茶仲正，白桃味香，酸甜適中。
炸邪惡滷豬大腸 $38﹕小食都有好多款，見到好邪惡嘅炸大腸好吸引，出面比較少見。大腸炸得香脆，脂肪適中，仲有膻味但唔腥，加左少少椒鹽，惹味。
烤地瓜球 $26﹕六大粒圓碌碌，炸得脆卜卜，中間原來係奶黃餡，微甜，不錯。
