by admin | 10 月 29, 2025 | 上海菜, 快餐, 深圳
美團外賣 29/10/2025 19:00
外賣都保持質素， 十分不錯。
深圳in城市廣場 18/5/2025 17:30
小楊生煎 19.5元﹕小楊生煎嘅生煎包絕對係一大驚喜，令人回味無窮！每隻生煎包個底煎到金黃香脆，但頂部依然保持柔軟。包皮唔算太厚，口感彈牙。咬開一啖，最令人驚喜嘅係多到爆汁，肉汁仲熱辣辣，非常澎湃。肉餡扎實，充滿濃郁嘅肉香味，味道甜甜的，用料非常足。高質，性價比極高!
小楊鮮肉小籠 15元﹕小楊鮮肉小籠就係細膩版本。細細粒嘅小籠包白白靚靚，皮薄晶瑩，隱約可以看見內裡豐富嘅鮮肉餡料，賣相已經非常吸引。輕輕用筷子夾起，感受到包皮嘅堅韌同彈性。細細粒可以一啖一啖，又係一咬爆汁，湯汁濃郁而鮮甜唔會油膩。內餡充滿豬肉甜香，沾少少酸醋，味道更加清爽，完完全全停唔到口！
外賣都咁高汁，平靚正！
崗廈北深圳之眼 17/11/2024 17:30
蟹粉生煎雙人餐 31元
套餐包括一份蟹粉大蝦雙拼及魚丸湯。今期主題限定蟹粉生煎包，上枱新鮮熱辣，外皮金黃鬆脆，脆卜卜，中間有豐富嘅肉餡仲有蟹粉，味道不錯。另一款內餡有大大隻大蝦，好豪華。魚丸非常爽口彈牙，味道不錯。
小楊生煎四隻 12元
大眾點評優惠$12可以食到四隻小楊生煎包，好抵食。新鮮熱辣打開包皮，肉汁流晒出嚟，肉餡甜甜的，非常不錯。
深圳印力中心 14/1/2024 11:00
黎到印力中心食個簡簡單單brunch，想試呢間生煎包好耐，環境闊落，都坐得幾舒服。
意式牛肉套雙人C餐﹕三拼牛肉小楊生蝦、雞絲湯麵、魚丸湯、特色炸豬排 57.5元
意式牛肉套餐A﹕牛肉小楊雙拼、油豆腐百葉包粉絲湯 28元
生煎包新鮮熱辣，包厚皮，煎得香脆，中間爆多汁，肉餡都好豐富，味道唔錯。
魚丸爽口彈牙。炸豬扒略為乾身少少。粉絲湯份量多，粉絲吸收湯汁。
鮮雞湯鮮肉小餛飩 11元：份量唔少，一大碗，小雲吞皮薄材料多。
打卡送里脊肉 (原6元)：啖啖肉一串，調味不錯。
by admin | 10 月 29, 2025 | Blog, 中菜, 四川菜, 深圳
深圳高新園 29/10/2025 18:00
青蒜回鍋肉﹕五花腩片肥瘦適中，炒到邊位有微微焦香同香脆感，肉質嫩滑。青蒜清香又解膩，配埋豆豉同醬料嘅咸香，非常惹味。成碟菜都充滿鍋氣，味道濃郁又唔會過咸，係一碟好下飯嘅家常美味。
擂椒皮蛋茄子﹕有驚喜嘅一味涼菜，茄子蓉軟糯，配埋煙韌嘅皮蛋粒，口感細緻又有層次。搗爛之後，辣椒既鮮辣同清香完全發揮出嚟，辣勁夠晒，各種食材味道完全融合，真係令人食指大動。
豬油渣炒菜心﹕翠綠嘅菜心新鮮爽口，本身清甜同有水份。豬油渣炸到金黃酥脆，帶嚟濃郁嘅油香，蒜蓉香，鑊氣十足，味道啱啱好，油而不膩。
招牌口水雞﹕雞肉滑嫩多汁，雞皮爽彈，質素一流，醬汁絕對係靈魂所在，麻、辣、鮮、香、甜、酸齊備，層次豐富又平衡得好好。紅油香氣撲鼻，花椒嘅麻味啱啱好。
呢度嘅菜式風味正宗，整體用餐體驗極佳，無論係菜品味道定係服務都好出色，味道地道。
by admin | 10 月 25, 2025 | Blog, 小食, 西餐, 觀塘, 麵包, 麵食
觀塘 25/10/2025 14:00
無食一排原來轉左餐牌，多左唔同款式，而且價錢仲抵左，吸引。
菠蘿煙肉安格斯牛肉漢堡 $168: 食過幾次都不錯，今次encore。賣相靚仔，份量十足，麵包表面微微烤焦，夾著厚實多汁嘅安格斯牛肉餅，牛肉餅質感紮實，肉汁豐富，濃郁牛肉香氣，熟度岩岩好。一片烤得微焦嘅菠蘿片，自然甜味帶微酸同焦香，好清爽。煙肉煎到脆卜卜，仲有新鮮生菜、番茄，醬料酸酸甜甜，整體不錯。薯條一向都高水準，即炸又香脆，外脆內軟，咸味適中。
脆皮燒豬腩配蜜糖紅菜頭菠蘿沙律 $98: 擺盆賣相討好，豬腩整齊排好，仲有紅色嘅紅菜頭菠蘿沙律。燒豬腩外皮金黃酥脆，切面層次分明，脂肪分布均勻，入口時外皮酥脆，內裡鮮嫩多汁，脂肪部分經過烘烤後香而不膩，帶有濃郁燒烤香氣。菠蘿酸甜清新正好解油膩感，配搭不錯。
卡邦尼扁意粉 $88: 醬汁有濃郁奶香味，仲有好香芝士味，口感絲滑濃稠。加上超多咸香煙肉、洋蔥同蘑菇，味道超豐富。扁意粉煮得岩岩好，口感彈口，索晒濃稠嘅醬汁。整體而言，都係食過最好味嘅卡邦尼意粉。大愛!
by admin | 10 月 19, 2025 | 台式, 大埔, 拉麵
科學園 19/10/2025 12:30
紅燒半筋半腩牛骨湯麵 $75﹕牛肉炆得非常軟腍入味，牛筋部分更加係入口即化，充滿膠質。紅燒湯底濃郁，麵條粗身，掛湯能力好強，食落去好彈牙。
鹽酥大雞排湯麵 $68﹕鹽酥雞超大塊，視覺上已經好震撼。外皮炸得香脆，內裡肉汁豐富，九層塔嘅香味好突出，非常惹味，雞肉本身仲好厚實，肉質嫩滑多汁，湯麵嘅湯底比較清甜，口感軟滑得嚟又帶點彈性。
醬燒豬頸肉肉燥飯 $68﹕幾片厚切嘅醬燒豬頸肉整齊咁鋪喺飯面，旁邊仲淋滿咗香噴噴嘅肉燥，豬頸肉燒到表面帶點焦香，爽口彈牙。醬汁嘅味道甜甜鹹鹹，好惹味，肉燥睇肥瘦均勻，充滿油香同醬油香，用嚟撈飯簡直係絕配。
by admin | 10 月 18, 2025 | Blog, 小食, 尖沙咀, 拉麵, 日式料理
尖沙咀東 18/10/2025 14:00
上次試過呢間鹽味清湯底非常唔錯，再來encore。
北海道豚足濃清湯拉麵 $108﹕呢款就係鹽味清湯底，清澈而鮮甜，鹽味清湯底以鹽味清雞湯為基調，清爽濃郁唔油膩，而且湯底鹹度適中，可以大啖湯。麵條口感彈牙，煮得剛剛好，粗細適中，可以吸收湯底精華。豬手大大件，經過長時間燉煮，肉質超級軟嫩，膠質豐富，入口即化。大大片叉燒都係亮點之一，肉質鮮嫩，脂肪分佈均勻，入口即化。兩條炸牛蒡香酥可口，咸香味十足。，溏心蛋溏心度剛好，又腍又滑。
白松露慢煮叉燒濃清湯拉麵 $108﹕呢款拉麵加左白松露，白松露撈勻係湯底，香氣超香，回味無窮，完全係另一種風味。
午餐加$38可以加配小食同飲品，今次揀左名古屋雞翼，味道咸香，仲有好香芝麻味，外皮酥脆，中間多汁，不錯。而炸洋蔥圈真係超酥脆，外皮脆脆，中間和洋蔥夠晒甜。加上沙律醬酸酸甜甜。
店員講每日只賣100碗，賣哂就收鋪，真係受歡迎。
by admin | 10 月 12, 2025 | 外賣, 深圳, 港式, 甜品
外賣@新洲 12/10/2025 19:00
招牌椰子凍 25元﹕原個椰子上，造型夠晒霸氣。椰子凍係用新鮮椰皇水同椰漿整成，每一啖都充滿住天然嘅椰子清香。質感好似啫喱咁滑。食完個奶凍，仲可以刮埋入面啲椰肉食，又嫩又滑。椰子凍清甜解渴，完全唔會有甜膩嘅感覺。
芋圓西米椰奶凍 12.99 ﹕底層係滑溜溜嘅椰奶凍，上面鋪滿咗五顏六色嘅芋圓同晶瑩剔透嘅西米。椰奶凍清甜軟滑，芋圓煙韌Q彈，非常有嚼勁，再加埋西米嘅顆粒感，口感三重奏喺口入面爆發。
順德雙皮奶 13元﹕表面嗰層奶皮皺摺分明，入口充滿油脂甘香。雙皮奶燉得好滑，好似布甸咁，奶味極之濃郁，甜度控制得啱啱好。
