阿婆牛雜
后海嘉樂道 30/11/2025 18:00
牛腩小煲單人套餐 38.8: 牛腩炆得夠腍夠入味，輕輕一夾就散開，吸滿醬汁嘅精華，每一啖都又香又軟，肥瘦分佈剛剛好，肉質唔韌。
牛雜小煲單人套餐 34.8: 牛雜就處理得乾淨無雜味，口感層次又夠豐富，有爽口、有煙韌、仲有啲入口即化嘅，醬汁香濃惹味，白飯就啱啱好吸晒啲汁，份量又夠飽肚。
灣灣士林古早伯 寶島美食
后海匯 30/11/2025 16:30
台灣大腸麵線配古早紅茶只需要24元，真係勁抵食。
台灣大腸麵線﹕份量都幾多，濃郁嘅柴魚高湯香氣已經撲鼻而來。湯底濃稠度啱啱好，加上少少黑醋同蒜蓉，味道層次即刻昇華。主角大腸處理得極之乾淨，完全無腥味，滷得非常入味而且口感煙韌有咬口。幼滑嘅麵線掛滿惹味嘅湯汁，順滑到可以直接滑入喉嚨，每一啖都充滿地道嘅台灣夜市風味。
另一碗「魚肉麵麵線」湯入面加左魚肉，份量十足，食落極之鮮甜彈牙，配埋吸滿精華嘅麵線一齊食，滋味無窮。
潮風堂 潮汕菜 潮汕家味
深大南站 30/11/2025 12:00
點評免費試。
啫啫走地雞﹕鐵板一上枱熱辣辣，紅蔥頭、薑片同醬汁爆香嘅氣味即刻撲鼻而來。走地雞肉質極之紮實彈牙，連皮食更加係充滿天然油香。雞塊邊緣帶點微焦，入面依然嫩滑多汁。雞肉索晒秘製醬汁嘅精華，惹味得嚟又唔會蓋過雞肉本身嘅鮮甜，用嚟送飯真係一流。
高堂菜圃煎蛋﹕呢碟煎蛋煎到金黃色，外層邊緣微微焦脆，入面就保持住厚實綿滑嘅口感。高堂菜脯獨有嘅鹹甜爽脆，同濃郁嘅蛋香好夾。菜脯粒粒分明，咬落去索索聲，令到原本簡單嘅煎蛋變得層次分明，完全帶出地道嘅潮汕家鄉風味。
潮汕時令蔬都幾新鮮，仲可以白飯任裝，抵食。
光光吃面包吧
深圳海岸城 30/11/2025 11:00
黃天鵝多拿滋 3.9元﹕麵包體咬落去極之鬆軟煙韌，外層均勻咁沾滿細砂糖，口感層次豐富，蛋香極之濃郁。顏色呈現靚靚嘅橘黃色，，甜度控制得啱啱好。食完一成個都完全唔會覺得漏。
紅豆黃油多拿滋 11.9元﹕鬆軟嘅多拿滋入面，夾住一塊厚厚嘅香滑牛油同埋綿密起沙嘅紅豆蓉。微溫嘅麵包將牛油微微融化，鹹香嘅油脂完美包裹住微甜嘅紅豆。鹹甜交織嘅滋味喺口腔入面瞬間爆發，加上牛油嘅醇厚同紅豆嘅天然豆香，非常好味。
劉興記
旺角 29/11/2025 13:30
一向都知呢間招牌生煎包人氣非常高，今日經過竟然有位，食個快Lunch。
生煎包賣相已經好吸引，底煎到金黃香脆，面頭就灑滿黑白芝麻同蔥花。一咬開，薄薄嘅脆底超香脆，入面嘅湯汁多到爆出嚟，非常燙口，味道極之鮮甜，再嚟就係充滿肉汁嘅豬肉餡，調味啱啱好，唔會太鹹，充滿肉香，加埋啲湯汁一齊食，超正! 食完一個會忍唔住即刻想食第二個!
一籠熱辣辣嘅小籠包上到枱，小籠包個個都脹卜卜，輕輕咬開一小啖，湯汁又係超熱，充滿豬肉嘅鮮味同埋高湯嘅濃郁。再加上少少薑絲同醋一齊放入口，肉餡肥瘦適中唔油膩。
雞湯小雲吞賣相簡單樸實，湯頭充滿濃郁雞味，味道鮮甜得嚟一啲都唔油膩，小雲吞皮薄餡靚，一啖一粒啱啱好。個皮煮到好滑溜，幾乎入口即化，豬肉餡調味恰到好處，鮮味十足。
最緊要就係鮮甜豆漿任飲，超滿足。
貴妃膠
美團外賣 23/11/2025 20:00
鮑汁鮑魚雞飯 39元﹕原隻鮑魚炆得極之軟腍入味，咬落去彈牙又保留到海產獨有嘅鮮甜。雞肉處理得非常嫩滑，索晒濃稠嘅鮑汁精華。將鮮甜甘香嘅鮑汁撈埋白飯一齊食，每一啖都係極致嘅享受，惹味到令人停唔到口。
黃金鮑魚扣花生豬手飯 41元﹕豬手炆到起晒膠，外皮入口即化，滿滿嘅骨膠原喺口腔瞬間爆發。配埋炆到淋軟入味嘅花生，口感層次極之豐富。鮑魚嘅鮮味同豬手嘅脂香完美融合，醬汁濃而不膩。
金湯花膠雞飯 39元﹕金黃色嘅湯底極之吸睛，飲落去味道醇厚甘香，花膠充滿豐富膠質，滋補得嚟又唔會覺得燥熱。
