2025 高雄墾丁之旅 [4.6 高港遊］
29/12/2025 16:30
棧貳庫係好多個舊倉庫組合，有唔同文創、美食與無敵海景集合嘅複合式商場。適逢黃昏時間，見到夕陽，影相非常靚。
高港小火車 NT$100
乘搭高港火車係一個非常不錯嘅體驗。小火車會緩緩行駛過高雄港區，途經大港橋與充滿設計感的裝置藝術群、巨大船隻，沿住迷人嘅高港水岸線輕鬆吹海風，全程約15分鐘，又可以休息雙腿，用一種輕鬆方式，將高雄港的壯闊美景盡收眼底。
2025 高雄墾丁之旅 [4.5 哈瑪星鐵路］
29/12/2025 14:30
食飽飯，行出海邊，就係著名嘅打卡熱點「高雄彩虹屋」。呢排彩色小屋就喺漁港旁邊，紅橙黃綠藍齊哂，色彩繽紛，影相真係超級靚。打完卡沿住海邊行去哈瑪星台灣鐵道館，經過唔少大船，全程大約15分鐘，非常chill。
15:00 哈瑪星台灣鐵道館
展館入場費成人NT$149，連小火車套票NT$219 / 兒NT$169
高雄必到駁二藝術特區，打狗（即係高雄舊稱）車站。戶外有好多架真實火車頭，仲有迷你「哈瑪星駁二線小火車」。呢架迷你小火車真係可愛到爆，細細架但可以載住大家兜圈遊舊倉庫群，小朋友超開心。「哈瑪星台灣鐵道館」最吸睛一定係個超大型嘅鐵道模型，有唔同款經典小火車，成座模型還原台灣各地嘅風景同地標，最正係模型現場會跟住日夜變燈光，尤其去到夜景模式成個迷你城市亮晒燈，真係好有氣氛。全程遊玩個零鐘，非常適合親子。
2025 高雄墾丁之旅 [4.4 新濱町海洋廚房］
29/12/2025 13:30
落船後，嚟到位於鼓山碼頭旁嘅「新濱町海洋廚房」，裝修非常靚，有十幾間食肆，座位又舒適。
一幻拉麵
甜蝦麵頭拉麵、原味煎餃、飲品 NT$380﹕招牌嘅甜蝦麵頭拉麵，紅色湯底鮮甜濃郁，充滿甜蝦嘅精華，散發出超級濃郁海味。拉麵質地彈牙，非常掛湯。叉燒同溏心蛋非常好味。煎餃煎到金黃香脆，餃子皮薄薄地，入面嘅豬肉餡極之鮮嫩多汁，調味啱啱好，完全唔會覺得肥膩。
日乃屋
元氣特餐 NT$310﹕主打日式傳統風味，咖哩帶有淡淡嘅蔬果清甜，慢慢滲出惹味嘅微辣，面頭仲有一層半溶芝士，份量足夠拉絲，同濃郁嘅咖哩汁完美融合，口感變得超級綿密滑溜，芝士嘅奶香中和咗咖哩嘅辛辣。一塊大大塊嘅炸豬排，炸到金黃香脆，豬肉保留咗豐富嘅鮮甜肉汁，肉質軟嫩。仲有一隻半熟蛋，將蛋黃戳破，濃郁蛋黃液流出，成碟飯變得更加豐富同溫潤。
順億鮪魚專賣店
極味TORO海鮮丼 NT$450﹕豪華海鮮丼匯聚咗五款頂級新鮮食材，包括吞拿魚腩、三文魚、帶子、甜蝦同埋三文魚籽。吞拿魚腩油脂均勻，真係入口即化，有濃郁嘅魚脂香氣。三文魚同樣肥美，肉質極之嫩滑多汁。大大粒嘅帶子極度鮮甜，肉厚又鮮甜。嘅質感。甜蝦晶瑩剔透，蝦肉彈牙。三文魚籽圓潤飽滿，閃閃發光，爆出濃郁嘅海水鹹鮮味。連埋軟硬適中嘅醋飯一齊食，鮮味無窮。
醬燒豬肉丼 NT$230﹕豬肉片切得啱啱好，肥瘦均勻。經過高溫炙烤之後，豬肉表面帶有一層微微嘅焦香，肉質極之軟嫩多汁，完全唔會覺得嚡口。最吸引嘅絕對係面頭嗰層秘製醬汁。鹹甜適中嘅醬汁完美咁包裹住每一塊豬肉，惹味得嚟又唔會蓋過肉本身嘅鮮甜。軟糯Q彈嘅日本珍珠米，吸滿咗由豬肉流出嚟嘅肉汁同香濃醬汁，啖啖都充滿住精華。
2025 高雄墾丁之旅 [4.3 旗津單車遊］
29/12/2025 10:30
高雄旗津最適合輕旅行，最舒適嘅方式就係租架電動單車沿海邊自駕遊。網上搵到呢間「發囉蜜租車行」，價錢相宜，而且可以先預約，雖然車款外型比較舊，但係電力十足，行得非常爽快! 店主仲有埋建議路線，可以行晒主要景點。
第一站就去咗好有神秘feel嘅「星空隧道」。呢條本身係軍事戰備隧道，依家鋪滿夜光彩繪，超夢幻！一到隧道出口，突然見到大海同藍天，仲有巨浪拍岸，都幾澎湃，壯觀！
出番大街，就有白糖粿，番薯椪，其實就係煙煙韌韌糯米製品，熱到辣口，味道香甜。
沿路有唔少打卡位﹕旗津海水浴場、拱型門最有歐陸色彩、彩虹教堂打卡超靚、巨型海珍珠。基本上單車路沿海，可惜中間有部份地方有工程，但整體黎講都非常舒服。坐係單車上可以遮下太陽，又唔洗行得太累，車到邊睇到邊，打完卡又上番車繼續行，吹下海風，非常爽快，好岩一家大細，真係最正確嘅決定。
旗津老街有海味街，另外仲有唔同街邊小食。臨走買左串墨魚香腸，腸衣幾脆，肉味幾香，不錯。
大約1:30離開旗津，搭番渡船返鼓山。
2025 高雄墾丁之旅 [4.2 旗津渡輪］
29/12/2025 10:00
食飽早餐後，步行向旗津渡輪碼頭，班次都非常密，單程票價NT$30，船程只需要十零分鐘，就去到離島旗津。船係上下兩層，下層多數係機車，上層有冷氣主要係客座。今日天氣好好，景氣不錯。
船
2025 高雄墾丁之旅 [4.1 丹丹漢堡］
29/12/2025 09:00
今日係旗津之旅，由前金站去哈瑪星只需要5分鐘，真係極方便。今行必試高雄始創品牌丹丹漢堡，就係哈瑪星捷運站旁就有一間，決定就係呢度解決早餐。
香檸吉司豬排堡、蘑菇雞肉可樂餅 NT$119﹕賣相唔錯，麵包幾鬆軟，豬排炸得金黃酥脆，肉質厚實外酥內嫩，都幾有肉汁。最令人驚喜係果層特製香檸醬汁，微酸帶甜檸檬香氣，中和左炸豬排嘅油膩感，配上芝士加入咸香，仲有新鮮清爽嘅生菜，層次豐富，平衡。一份餐有兩件蘑菇雞肉可樂餅，外皮炸得極度酥脆，內餡係綿密細滑嘅馬鈴薯泥，包裹住鮮嫩嘅忌廉雞肉碎同蘑菇，味道香濃，調味適中，非常好食。
烤醬雞堡、鮮酥雞肉焿 NT$99﹕層鬆軟嘅麵包配上香濃烤醬雞扒，醬汁濃郁醬香，味道甘甜，雞扒鮮甜多汁，仲有新鮮清爽嘅生菜，完全係麥當勞將軍漢堡嘅味道，超開胃。焿湯充滿南部風情，湯底濃稠滑順，味道微甜，裡面有好多清甜高麗菜，仲有炸得香酥嘅雞塊，當炸雞浸泡入焿湯中，吸晒湯汁，外皮變得微軟，半酥半軟，口感非常獨特。
