沙田石門 20/12/2025 13:30
石門商場發現呢間非常抵食嘅小店，拉麵都相當唔錯。一個餐$58，拉麵加飲品，加$10仲有小食，超抵!
魚介豚骨醬油豬軟骨拉麵 $58﹕湯底有濃厚嘅豚骨味，充滿膠質，非常順滑，仲有魚介鮮甜味，唔會太油膩，微微醬油鹹香，不錯。拉麵都幾煙韌彈牙。大大件豬軟骨有驚喜，炆到超級軟腍，用筷子輕輕一夾就分開，連埋啲軟骨位都變成啫喱狀，入口即化，充滿骨膠原嘅感覺，調味適中又夠入味。
另一款係叉燒拉麵，碗上面鋪滿咗成三大塊圓碌碌嘅日式叉燒，肥瘦相間，邊位帶有微微嘅焦香，入口軟嫩，軟腍入味。
雞軟骨餃子煎到個底金黃香脆，薄薄嘅餃子皮包住豐富餡料，除咗有鮮甜嘅雞肉之外，仲加入咗切碎咗嘅雞軟骨。每一啖都食到雞肉嘅嫩滑多汁，同時又有雞軟骨脆脆嘅口感，好味。
旺角 20/12/2025 12:30
人氣烘焙店 Hashtag B櫥窗琳瑯滿目，超靚！
試左近期大熱開心果系列，開心果牛角包$30 外層酥皮層次分明，非常酥脆，上面一層厚厚嘅開心果脆皮朱古力，開心果味極之香濃，而且甜度適中，唔會覺得膩。
開心果酥 $28更有驚喜，酥皮牛油香味重，中間嘅開心果餡料多到爆晒漿，口感幼滑，有好實在嘅堅果香。
最後揀左一款士多啤梨窩夫 $36，賣相超靚，窩夫皮脆脆的，充滿蛋香。上面鋪滿咗大大片嘅新鮮士多啤梨，鮮甜多汁，中間係甜甜嘅吉士打醬，正好中和咗酸酸甜甜嘅果味。
沙田 14/12/2025 18:00
鐵板法式牛粒配白飯 $113﹕成個鐵板盛上，滋滋作響，夠晒熱辣辣。牛粒份量好足，每一粒都煎到表面帶少少焦香，內裡依然保持住粉嫩狀態，肉汁豐富，口感嫩滑又有嚼勁，唔會太韌。個醬汁調得啱啱好，夠香濃甜香，帶微辣，配上洋蔥同青椒等，索晒啲汁，撈埋白飯一齊食超正。
火車頭粉絲煲 $156﹕今次揀左雞湯底，配料超級豐富，包括牛丸、生牛肉、牛筋同烤牛肉。成個煲一上枱熱辣辣，生牛肉切得夠薄，放入熱湯輕輕灼一灼，入口極之嫩滑，牛味好濃。烤牛肉帶有微微嘅焦香，肉質比起生牛肉有嚼勁少少，食落去好惹味。牛丸爽口彈牙，一咬爆汁出。牛筋炆得非常軟腍入味，充滿膠質。
海南雞配黃薑飯 $79﹕賣相吸引，雞肉切得好靚，有光澤。雞皮爽口彈牙，唔肥膩，雞肉嫩滑到不得了。呢度嘅油飯粒粒分明，充滿雞油香、香茅味同椰香，但食落去又唔會覺得好油，加上辣椒醬酸辣開胃，正!
椰汁拉茶紅豆冰﹕底層係滿滿嘅紅豆，中間係椰汁味奶茶，茶香之餘，仲有好濃郁嘅椰香，茶底夠厚，無俾椰汁蓋過。紅豆煮得好腍身，起晒沙，每一啖都充滿豆香，甜度啱啱好。
土瓜灣 13/12/2025 14:00
今日去黎土瓜灣發現呢間幾有特色嘅餐廳，環境闊落，坐得非常舒服，點咗幾樣主菜，樣樣都有驚喜。
紅酒慢煮羊膝 $188﹕賣相勁吸引，一上枱已經聞到好香嘅紅酒味，羊膝炆得非常軟腍，用叉輕輕一篤就做到骨肉分離，完全唔韌，羊味好香。醬汁濃郁，有紅酒嘅果香同番茄香，微微酸甜好開胃，味道同羊肉嘅鮮味好夾。配上意大利飯，索晒啲汁，真係好滿足。
自家青醬天貝意大利飯 $88﹕第一次試天貝，非常特別，原來係來自印尼嘅發酵大豆餅，主要由黃豆製成，富含豐富植物性蛋白質嘅健康食品，豆味非常香濃。青醬味道好清新，羅勒味好出，意大利飯煮到啱啱好，口感外軟內韌，估唔到素食都可以咁好味。
法式海龍皇香煎龍躉柳 $228：龍躉柳煎得外皮金黃香脆，魚肉雪白嫩滑，魚油香氣十足，最好味係法式海龍皇湯底，濃稠度剛剛好，海鮮味非常突出，加上仲有大大隻八爪魚、帶子同蜆，非常豐富。
法式慢烤蘋果 $58﹕吃完主菜，當然要試試甜品。這款甜品賣相非常精緻，蘋果經過慢烤之後，口感變得軟糯綿密，果汁豐富，蘋果嘅天然酸甜味同玉桂香氣完美融合，再仲脆卜卜嘅果仁，味道非常有層次，將蘋果昇華到呢個層次，認真高級。
花果香草茶 $88﹕茶具非常靚，味道又好飲，酸酸甜甜嘅熱情果味好突出，除咗果味，仲有一陣淡淡嘅花香，優雅清新。食完啲重口味嘅主菜之後飲呢杯，真係即刻解渴又開胃，感覺好舒服。
燕麥鮮奶咖啡 $42﹕用咗燕麥鮮奶嚟沖，奶泡打得好綿密，入口好滑順。咖啡豆嘅味道幾香濃，有少少果仁味，同燕麥奶嗰種獨特嘅麥香味好夾，飲完個口仲會留有少少甘香，非常不錯。
總的來說，幾道菜式都做得好有心思，一個好適合悠閒周六嘅好去處。
深圳卓悅中心 7/12/2025 11:00
點評用霸氣積分換取呢一個套餐，非常抵食，味道都不錯。
安格斯肥牛壽喜鍋，配料非常豐富，湯底甜鹹適中，牛肉片煮十秒已吸滿甜甜嘅醬汁，口感滑嫩，入口即化。火鍋中仲有豆腐、大白菜、金針菇等蔬菜，都係索滿湯汁，天氣微涼時享用非常溫暖。
現烤鰻魚炒飯賣相不錯，醬燒鰻魚香氣撲鼻而來，米飯炒得粒粒分明，乾爽而唔油膩，均勻裹上醬汁，每一口都充滿鑊氣。主角蒲燒鰻魚肉質肥美軟嫩，搭配香鬆和蔥花，非常好味。
充滿玩味嘅壽司taco，將酥脆嘅紫菜做成taco餅皮，包住壽司飯、大量青瓜同蟹柳同吞拿魚，紫菜皮非常香脆，米飯軟糯，不錯。
吉列豬扒揸得香脆，雖然係預製品，但係條味不錯
芒果沙拉水果非常多，除咗芒果仲有哈密瓜等等，清爽鮮甜。
三文魚海鮮湯魚香味十足，非常鮮甜，有大大片三文魚魚肉同埋蘿蔔，足料。
