旺角 28/2/2026 14:00
鰻魚拼牛肉飯 $62
飯面鋪滿油潤亮澤嘅蒲燒鰻魚，陣陣醬油香氣，魚油甘香，甜鹹適中嘅蒲燒醬汁，撈飯超正。牛肉片切得夠薄，口感軟腍入味，而且肉汁豐富，充滿牛脂香氣。滿滿日式醬油同洋蔥香甜，超滿足。
肥牛豚骨鍋 $60
呢度嘅湯底夠晒濃郁，味道香甜。主角牛肉份量唔少，牛肉切得薄薄哋，肥瘦分佈平均。將牛肉放落滾湯度輕輕拖兩下，肉質食落非常軟腍嫩滑。火鍋嘅配料都好豐富，有大大件蟹柳、金針菇、鮮甜嘅蔬菜、嫩滑豆腐。蔬菜索滿晒湯底嘅精華，惹味到極，最鍾意超甜粟米，爆多汁，淨係食配料都已經好滿足。
絕對係性價比極高嘅之選，價格極之親民。
馬鞍山 22/2/2026 18:00
星州炒貴刁 $58﹕貴刁條條分明，面頭沾滿濃郁惹味嘅咖喱香氣，帶住少少微辛，超級開胃。配料方面極之足料，有鮮甜嘅蝦仁、香口嘅叉燒絲同埋爽脆嘅芽菜，口感層次極之豐富。
乾炒豬扒炒即食伊麵 $53: 公仔麵炒得啱啱好，保持到彈牙嘅口感，完全唔會糊口。豬扒外層煎到微脆，肉質依然軟腍多汁，醃得極之入味，鹹香惹味。
一口雞蔥油撈麵 $58: 雞扒煎到外皮金黃香脆，肉質嫩滑豐厚，大量蔥油醬，味道勁香，公仔麵完美吸滿晒蔥油精華。
馬鞍山 22/2/2026 12:00
搵食工房，馬鞍山小店，無論係份量定係味道都交足功課，超級滿足！
風沙蒙古炸牛肩扒薯菜 $62﹕賣相極之有霸氣，牛肩扒肉質保持得極之軟腍多汁，滿滿牛脂香氣，加上蒙古香料完美融，微辛嘅風沙調味，味道極之豐富。配埋焗薯，味道香甜，加上沙律醬超好味。
日式咖哩吉列豬扒溫泉蛋大碗飯 $56﹕吉列豬扒炸得極之金黃鬆脆，肉質厚實又juicy，咖哩汁香料味勁濃，辣度岩岩好，撈飯超正。撈埋溫泉蛋味道柔和又另一番風味。
焗周打蜆汁小元貝魚柳意粉 $60﹕舖滿芝士賣相吸引，醬汁係濃郁嘅周打蜆汁，完美掛滿每條意粉，面頭鋪滿彈牙嘅小元貝同煎到微脆嘅魚柳，熱辣辣，相當不錯。
旺角 21/2/2026 13:30
自選天婦羅定食 $116﹕自選彈性高，鍾意食乜就叫乜。一上枱見到一大碟天婦羅，賣相已經好吸引。天婦羅穴子真係成餐飯嘅亮點，條穴子長到隻碟都裝唔晒！炸漿薄脆，穴子肉質細嫩綿密，魚油香氣豐富。珍寶蟹柳份量十足，一咬開係絲絲分明嘅蟹肉質感，鮮甜多汁，炸過之後更加香口。天婦羅帶子係半生熟狀態，外層酥脆，入面依然保持刺身級嘅軟嫩鮮甜，火候控制得啱啱好。至於黑虎蝦，肉質爽口彈牙，蝦味濃郁。選擇配上冷酢橘烏冬，湯底清澈，入口帶有淡淡嘅鰹魚鮮味，最正係酢橘嘅酸香非常突出，清新醒神，烏冬口感極之煙韌彈牙，掛湯力強，雪得夠凍，夠晒清爽，正好中和天婦羅嘅油膩感，完美。
蒲燒鰻魚丼 $88﹕絕對係經典中嘅經典，一大塊厚肉嘅鰻魚鋪滿喺飯面，表面燒到焦糖化，油潤亮澤，賣相非常吸引。用筷子輕輕一夾，鰻魚肉質極之鬆軟肥美，入口即化。蒲燒醬汁調得恰到好處，甜鹹適中，撈飯一流。再飲啖麵豉湯，味道濃郁，充滿豆香，就係一餐簡單而又充滿幸福感嘅享受。
雞皮餃子 $48﹕將傳統餃子皮換成雞皮，將免治雞肉餡包住再拎去炸，超驚喜。外皮金黃香脆，非常誘人，滿口都係雞油嘅甘香，內裡嘅雞肉餡料鮮嫩多汁，沾少少醋非常好食，比起普通餃子惹味得多。
紫薯紅豆豆腐雪糕 $38﹕豆腐雪糕嘅口感綿密，豆味非常突出，甜度適中，感覺好清新。紫薯天婦羅，香甜軟糯，而紅豆蓉就煮得粒綿密。將三樣嘢一齊食，唔會太甜膩，充滿日式風情，為整餐飯畫上一個清新又滿足嘅句號。
最後叫多一支提子汽水 $10，完美。
價錢唔貴，食物高質，值得再來。
深圳寶安大仟里 19/2/2026 16:00
泥石流爆奶華﹕極具視覺震撼，一切開表面厚厚嘅可可粉同烘到金黃香脆嘅多士，入面嘅特製奶醬就好似泥石流咁洶湧流出嚟，賣相極之邪惡！多士外脆內軟，吸滿晒濃郁嘅鮮奶同朱古力香。
黯然銷魂叉燒飯﹕叉燒燒得靚，半肥瘦嘅肉質極之軟腍，表面帶有陣陣誘人嘅微焦香氣同蜜汁嘅香甜。最靈魂嘅係面頭嗰隻燶邊太陽蛋，輕輕篤穿個太陽蛋黃，等啲滑溜蛋汁流落熱辣辣嘅白飯度，再撈埋秘製甜豉油一齊大啖大啖咁食，正。
雞蛋仔﹕熱辣辣新鮮出爐嘅雞蛋仔賣相可愛，口感軟綿綿，中間仲有奶黃醬，甜度適中。
炸雞翼薯條﹕雞翼外皮炸得極之酥脆，咬開仲有豐富嘅肉汁流出嚟，肉質保持得極之嫩滑。薯條炸到金黃色、外脆內軟。
香港小吃拼盆﹕一次過試勻多款口味，首先係滑溜無比嘅混醬腸粉，腸粉完美掛滿香濃嘅花生醬、甜醬同麻醬。仲有極之彈牙爽口嘅咖哩魚蛋，微辛嘅咖哩汁香濃惹味，極度開胃。滷水雞翼夠入味，醬汁醇厚甘香。炸蝦卷鮮甜嘅蝦肉配上酥脆外皮，口感極佳。
深圳壹方城 19/2/2026 12:00
今次嗌咗佢哋超抵食嘅火鍋二人餐173元，份量十足之餘食材仲極之新鮮。
個餐最核心嘅當然係個牛骨清湯底。湯頭清甜甘香，完全帶出牛肉本身嘅純粹鮮味。二人餐包咗幾款唔同部位嘅鮮切牛肉，每片牛肉都切得厚薄適中，放落滾湯度輕輕淥十幾秒，肉質即刻變得粉嫩誘人。咬落去超級軟腍多汁，豐盈嘅牛脂香氣喺味蕾爆發，配埋特製嘅沙茶醬一齊食，惹味到令人一啖接一啖咁食。
招牌手工河粉晶瑩剔透，吸收晒牛肉湯底嘅精華，口感極之滑溜煙韌，帶淡淡嘅米香，仲可以無限任食。二人餐仲配埋極之新鮮嘅蔬菜拼盤同手打牛丸。牛丸極之爽脆彈牙，有滿滿嘅肉汁。
潮汕炸豬肉卷炸到超級酥脆，入面嘅豬肉餡極之足料，肥瘦比例啱啱好，仲加入咗爽脆嘅馬蹄粒，五香粉味道幾香。
潮汕粿肉炸得外皮微焦香脆，口感扎實得嚟又帶點煙韌，點埋酸辣汁，酸酸甜甜和咗炸物嘅油膩感。
