Kumo Kumo 三倍抹茶芝士蛋糕
深圳福田站 26/4/2026 19:00
三倍抹茶芝士蛋糕 36.9元﹕茶味真係非常突出。入口第一下感受到抹茶特有嘅微苦同回甘，隨後芝士嘅奶香就會慢慢滲出嚟。蛋糕嘅口感超級綿密軟滑。佢質地輕盈得嚟又夠實淨，真係做到入口即化。最欣賞佢甜度控制得啱啱好，微苦嘅抹茶完美中和咗芝士本身嘅油膩感，令到成件蛋糕食起上嚟非常清爽。
破店肥哈
深圳皇廷廣場 26/4/2026 17:30
今次主攻咗幾款招牌串燒，每款食材炭香十足，調味重手得嚟又唔會遮過晒食材本身嘅鮮味。
純羊小串 25.8元﹕羊肉燒得啱啱好，表面微微帶焦，入口油香四溢，羊味香濃得嚟夠羶，表面撒滿嘅孜然粉同辣椒粉，超級惹味。
小嫰牛 25.8元﹕呢款串燒食落極之軟嫩，牛肉完全無燒到乾爭爭，反而鎖得住滿滿嘅肉汁，鮮甜嘅牛肉味配上濃郁嘅燒烤調料，正!
牛舌 7.8元﹕切得厚薄適中，燒完之後外層帶住微微嘅焦香，咬落去極之彈牙爽脆。
魷魚鬚 24.8元﹕表面塗滿咗秘製醬汁再用猛火猛烤，帶住陣陣迷人嘅煙燻炭香，口感煙韌。
包老爺小籠包
連城新天地 26/4/2026 18:00
點評探店
包老爺小籠包主打傳統手工製作，味道地道，令人一試難忘。招牌嵊州小籠包皮薄餡多，包皮都幾鬆軟，中間有湯汁鮮甜濃郁，餡料用料十足，豬肉鮮嫩多汁，入口即化。
紫菜湯小雲吞則係另一款必試之選，湯底清甜，帶有紫菜嘅鮮香，雲吞皮薄如紙，內裡包住鮮嫩嘅豬肉餡，細細粒但味道濃郁，每一啖都係滿滿嘅幸福感。呢兩款招牌菜式無論係口感定味道不錯，性價比高!
一緒に和牛壽喜燒
深圳中航城 26/4/2026 12:00
今日特登試超人氣嘅「一緒壽喜燒」自助餐。最基本四款肉任食，加上自助火鍋吧任食，點評券成人都係104元，即場買兒童券55元。
壽喜燒湯底夠晒濃郁，醬油嘅鹹香同鮮甜味調得啱啱好，湯底越煮越惹味。重點緊係無限追加嘅高質牛肉，啲牛肩肉同和牛片質素好有驚喜，油花分佈得好靚。自助區都好有誠意，有齊各款新鮮蔬菜、菇類同豆製品，丸類款式都超級多，賣相都唔錯。自助區仲有各式各樣嘅飲品、雪糕同甜品任揀。最開心係自製珍珠奶茶非常好飲，雪糕甜品都不錯。
整體嚟講，性價比極高，係時間1.5小時輕微太趕。
打卡送小禮品。
Oppa Coffee Bar Restaurant
尖沙咀 25/4/2026 14:00
嚟到尖沙咀旺角街食地道韓國菜。
海鮮流心小丸子 $238: 製作過程趣味十足，DIY，將芝士倒入炒飯中攪拌均勻，放入小丸子機，再加入牛奶蛋漿煎熟。每粒小丸子都圓轆轆，非常成功!估唔到份量咁多，整左三大底，飽晒! 小丸子外層金黃微脆，內裡係滿滿嘅芝士同海鮮炒飯，炒飯咸香微辣，加上濃郁嘅芝士同紫菜，味道非常夾。好玩又好食!
炸雞柳配沙律 $160: 份量超大，炸雞外皮炸到金黃酥脆，入面嘅雞肉仲鮮嫩多汁，而且啖啖肉，簡單加上酸甜蛋黃醬，已經非常惹味。食完邪惡嘅炸雞再食埋清新解膩嘅沙律，沙律菜超級新鮮爽脆，配搭埋微酸嘅柚子沙律汁，仲有酸甜爽脆嘅蘿蔔，入口極之清新。
金記小食酸辣粉
太子 24/4/2026 18:00
鍾意掃街搵食，試左幾款人氣招牌美食。
招牌酸辣粉配咖哩魚蛋﹕香氣已經令人食指大，紅薯粉吸滿精華湯汁，入口微辣帶酸。分量足料，大量肉碎、花生、青蔥、炸菜等，加入彈牙咖哩魚蛋，正!
最佳搭配就係大腸豬紅蘿蔔韭菜﹕重口味之選，酸辣湯底好香。大腸白白滑滑，爽口彈牙。豬紅切得厚身且分量十足，質感滑溜。大大件白蘿蔔吸收了辣汁精華。
碗仔翅﹕湯底極之濃稠，食到豐富嘅木耳絲、筍絲、蛋絲同粉絲。加入幾滴麻油、胡椒粉同醋，就係港式風味。
腸粉燒賣魚蛋三併﹕白滑的腸粉充滿米香，皮薄餡靚﹔魚蛋粒粒彈﹔燒賣魚香味濃，最緊要係超充足嘅甜豉油同甜醬，仲有芝麻，勁香。
