Cream Story
深圳萬象食家 21/6/2026 15:00
點評筆記禮盒搶到CREAM STORY意大利手工冰淇淋雙球。試左唔同味道，最後揀左兩款人氣Gelato，開心果味同榛子味。賣相亦唔錯，份量唔少。Gelato質感綿密細滑，入口即化，奶油份比較重，感覺厚重。開心果味濃醇厚，啖啖都食到開心果本身嘅油潤同香甜，仲有回甘，真材實料。榛子味果但香更加濃厚，微微焦香。
明洞朴代表韓式自助烤肉
深圳筍崗寶能環球會匯 21/6/2026 12:00
今次北上試咗人氣高企嘅「明洞朴代表」韓式自助烤肉。新開業成人只需要59.8元，兒童38元。任點任食100分鐘，準時提醒交枱。
餐廳環境充滿濃厚嘅首爾街頭風，自助區擺滿晒各式各樣嘅肉類，包括招牌厚切豬五花、醃製牛肋骨、雞翼同埋多款海鮮。肉類雪得乾淨企理，refill速度亦都好快。肉類喺鐵板上燒到外皮金黃香脆，油脂四溢，調味唔算太濃，可以自行加調味醬料。除咗燒肉，自助吧仲有大量韓式熟食、炸雞、飲品、雪糕等。
自助落單都有唔少選擇，韓式水冷麵解膩又消暑，麵條口感煙韌彈牙，非常有咬口，湯底酸甜清爽，透心涼。韓式炸雞外皮微脆，肉質都算鮮嫩多汁，外層均勻包裹住惹味嘅醬汁，有辣有唔辣。韓式吞拿魚拌飯份量唔少，面頭鋪滿咗吞拿魚、大量沙律醬同香脆嘅紫菜碎，將所有材料同熱辣辣嘅白飯撈勻，口感豐富 。最後仲有椰奶冰做甜品，賣相不錯，椰味夠香。
價錢真係勁平，以呢個價位黎講，食物質素同選擇算不錯，味道還好。
有運燒味
炮台山 20/6/2026 16:30
經過炮台山市政大樓發現非常抵食嘅燒味飯，燒味飯只需要$30一盒，份量充足，非常足料，仲送埋嘢飲，真係超級抵食。叉燒賣相不錯，甜蜜油潤，肥瘦適中，貴妃雞啖啖肉，送咗一片紅腸味道都不錯最緊要甜醬油同埋薑蓉落得充足，送飯一流。
冒喜
灣仔 20/6/2026 14:00
八寶套餐 基本八款料$72，部份高級材料加$3/$5就有。湯底揀左潮汕沙茶湯配火鍋麵，陣陣濃郁沙茶香，味道甜甜地非常濃厚花生香，鹹香惹味。火鍋麵煙韌爽彈，吸晒沙茶湯嘅精華。八寶套餐可以自選八款材料，滑牛肉就嫩滑多，同沙茶湯超夾。魚腐夠鬆軟勁索汁，手打牛丸彈牙多汁，豬大腸超肥美，鯛魚片滑溜溜又鮮甜。特製沾醬(+$3) 勁香蒜蓉，輕微辣味，加分。套餐配飲品，特飲(+$5)，非常飽足。
番茄濃湯底米線，陣陣濃郁番茄香，味道酸酸甜甜，仲有啖涼番茄肉。米線滑溜吸滿晒番茄湯嘅精華。墨魚丸爽脆彈牙，蟹子丸飽滿嘅蟹子喺丸入面，芝士腸腸衣脆卜卜，粟米蝦卷蝦肉爽彈鮮甜。
自家製酸梅青檸烏龍茶﹕陣陣酸梅香同烏龍茶香，酸度夠晒鮮明，青檸嘅清新酸香同烏龍茶嘅醇厚回甘，甜得嚟又夠清爽，非常醒胃。
自家製洛神花山楂蘋果﹕花香同微微果酸山楂嘅酸甜醒胃，蘋果味道天然清甜。
自家製桂花蜜烏梅冰粉 $18﹕冰粉本身Q彈爽滑，晶瑩剔透，入口即化，桂花蜜酸酸甜甜，加上山楂凍，清新酸甜，整體黎講非常解膩。
牛奶冰室
馬鞍山 19/6/2026 17:00
牛奶冰室下午茶真係抵到一個點。
豬扒炒公仔麵 $51﹕鑊氣十足，一上枱已經香氣撲鼻。公仔麵炒到條條分明兼夠乾身，索晒醬油同蔥香，口感煙韌彈牙。豬扒厚切大件，經過醃製後煎到外皮微脆，肉質依然保持嫩滑多汁。啖啖麵配埋啖啖肉，惹味又飽肚。
星州炒貴刁 $50﹕充滿南洋風味嘅炒貴刁鑊氣十足，非常香口惹味。河粉炒到邊位微微燶香，煙韌彈牙，調味香帶輕微咖哩辣度。配料豐富，火腿、鮮蝦、雞蛋、韭菜同芽菜等。
焗鮮茄豬扒飯 $43﹕份量一啲都唔輕量，熱辣辣，面頭厚厚嘅芝士焗到金黃微焦，拉絲效果理想。底層係酸甜開胃嘅新鮮番茄汁撈飯，配埋外脆內嫩嘅厚切焗豬扒。茄汁嘅天然果酸中和咗芝士同豬扒嘅膩感，開胃又滿足。
冰火菠蘿油 $12﹕外層嘅菠蘿包皮焗到金黃酥脆，面頭嘅格子香甜鬆化，加熱後暖笠笠。夾住一厚片冰凍牛油，利用包身餘溫慢慢融化喺熱辣辣嘅包心入面。一口咬落去，冰火交融嘅口感加上濃郁牛油香。
經典西多士 $20﹕厚切方包沾滿蛋漿後炸到外脆內軟，切開入面有香濃嘅花生醬夾心。面頭放上一大塊牛油，再淋上滿滿金黃糖漿，甜絲絲同鹹香完美結合。
Yatai Plus
沙田石門 19/6/2026 12:00
牛盛丼 $95﹕一上枱已經見到碗面鋪滿咗層次豐富嘅牛肉，視覺效果震撼。牛五花油脂分明，燒到香氣四溢，入口肉汁四溢，軟嫩入味，完全唔會韌。配埋面頭嘅洋蔥、炸蒜，非常香甜惹味。份量十足又極具滿足感，肉食獸真係必試！
雞扒胡麻沙律汁冷稻庭烏冬 $75﹕夏日消暑嘅一流之選！主角雞扒煎到外皮金黃香脆，肉質依然保持鮮嫩多汁。稻庭烏冬條條掛汁，口感煙韌彈牙，冰涼爽口。淋上咗香濃幼滑嘅自家製胡麻沙律汁，芝麻香氣撲鼻，酸甜適中，撈埋清新嘅沙律菜一齊食，開胃又惹味非常清新。
豚軟骨咖喱飯 $75﹕豚軟骨炆到極之軟淋入味，肉質酥軟，軟骨部分更係一咬即化、滿滿骨膠原。日式咖喱汁質地濃稠，香甜微辣，層次豐富，同熱飯完美結合，每一啖都吸滿咗濃郁嘅咖喱香氣。
跟餐送飲品「蜂蜜檸檬」清新酸甜，鮮榨檸檬嘅清香中和咗蜂蜜嘅甜膩，冰涼透心涼，食完濃味嘅料理飲一杯即刻解膩。而暖笠笠嘅「熱雪梨蜜」就充滿天然嘅梨香同溫潤嘅蜜糖甜味，入口順滑滋潤，熱辣辣飲落去非常舒緩喉嚨。
