尖沙咀 31/7/2026 20:00
今日放學食晚餐，呢度極有港式地道風味。
南乳元蹄、招牌虎蝦雲吞、蝦子撈幼麵 $70: 元蹄炆到極之軟淋，充滿豐富嘅骨膠原，皮香肉滑，非常入味。招牌雲吞大大粒，脹卜卜，入面嘅鮮蝦爽彈鮮甜。撈麵口感煙韌彈牙，上面鋪滿咗香濃嘅蝦子，拌勻之後每一啖都充滿鹹香。
招牌虎蝦雲吞、陳皮鯪魚球、騸牯牛肉湯麵三拼湯麵 $54: 呢碗三拼非常豪華。手打鯪魚球口感彈牙扎實，咬落去帶有淡淡嘅陳皮香氣，鮮味十足。牛肉片肉質嫩滑且牛味濃郁。湯底原汁原味。
蜆介鯪魚球 $48: 懷舊港式小食，鯪魚球即叫即炸，外皮炸到金黃香脆，入面保持住彈牙煙韌嘅肉質，陳皮香氣濃。靈魂蜆介醬，鹹香惹味、酒香撲鼻，完美提升咗鯪魚球嘅鮮甜味。
低糖豆漿 $9: 豆味香濃，低糖，超解渴。
檸檬茶 $9
全單$190，食物味道都不錯，可惜味精太重。
鑽石山 30/7/2026 14:00
澳洲烤羊架伴牛乾菌意大利飯 $168﹕羊架兩大件份量十足，羊架外層烤到微脆，熟成度剛剛好，肉質保持粉嫩多汁，羶香濃郁。牛乾菌意大利飯煮到軟硬適中，每一粒米都索晒牛乾菌獨特嘅菌香同濃郁嘅忌廉湯汁，菇香四溢，同羊架非常夾。
雙層美國安格斯牛肉漢堡 $138﹕絕對係肉食獸嘅邪惡之選！漢堡包烤到脆卜卜，夾住兩大塊厚身嘅美國安格斯牛肉漢堡扒。漢堡扒煎到外微脆，中間肉汁大爆發，濃郁嘅牛肉香氣滿瀉。中間夾左芝士同新鮮沙律菜、番茄等，岩岩好中和油膩感。薯條新鮮炸起，金黃香脆，中間軟熟，成個組合份量十足，食完超級滿足！
藍莓芝士蛋糕 $48﹕餅底用咗牛油曲奇碎壓成，香脆可口。蛋糕質感極之綿密幼滑，入口即溶，有濃郁嘅芝士香氣，奶香十足。面頭鋪滿咗酸甜開胃嘅藍莓醬，仲有粒粒飽滿嘅新鮮藍莓，加一點水果嘅天然酸味，整體甜度啱啱好。
全單$354，單價小貴，簡單試幾樣。
銅鑼灣 27/7/2026 16:30
炒海帶絲 $40﹕非常地道嘅韓式開胃小菜，海帶絲軟硬適中，口感爽脆，調味啱啱好，加入咗麻油同白芝麻去提香，鹹香之中帶有淡淡嘅清甜，唔會油膩。
吞拿魚紫菜飯卷 $53﹕紫菜包住粒粒分明，軟糯適中嘅珍珠米，有唔同顏色嘅配料，賣相不錯。吞拿魚沙律落得夠慷慨，每一啖都食到滿滿嘅吞拿魚肉，口感綿密且濕潤，仲有雞蛋、青瓜絲同黃醃蘿蔔等爽脆配料，中和咗沙律醬嘅濃郁，層次分明、清新唔膩，份量唔少，真係性價比極高嘅飽肚之選！
韓式炸醬麵 $68﹕黑豆醬濃稠度剛剛好，帶有獨特嘅焦香同微微嘅洋蔥清甜，入面仲有豐富嘅豬肉碎同薯仔粒，口感豐富。麵條煙韌彈牙，撈勻之後每條麵完美掛滿醬汁，原咗韓式地道風味！
韓式芝士炸雞 $88﹕一大盒無骨炸雞啖啖肉，外層炸到金黃香脆，肉質依然保持到鮮嫩多汁，面頭鋪滿咗濃郁芝士粉，味道香甜惹味。
全單$249，出品不錯，份量比想像中多，值得再去。
銅鑼灣 27/7/2026 14:00
Lamb Biryani 羊肉香飯 $129﹕印度長米煮得粒粒分明，口感乾爽，完全冇黏埋一團，而且每一粒米都吸滿晒番紅花同黃薑味嘅精華，味道酸甜帶微辣。中間仲有大大件羊肉，燉煮到非常入味，肉質軟淋。旁邊仲有薄脆，咸香味，仲有果仁香味。白色類似乳酪醬，微酸清爽，岩岩好可以平衡香料嘅濃烈味。
Butter Chicken with Garlic Naan & Butter Naan 牛油雞配蒜蓉烤餅、牛油烤餅 $109﹕雞肉大大件，醬汁非常濃郁，質感幼滑綿密，茄香同牛油融合，酸甜微辣味，點薄餅最岩。配搭嘅兩款 Naan 熱辣辣，烤到邊位微焦，咬落去外脆內煙韌，Garlic Naan 表面鋪滿咗香脆嘅蒜蓉碎，Butter Naan 牛油香氣四溢。午餐仲有沙律、小食同飲品。
Aamchi Vada Pav 印度式漢堡 $78﹕外層嘅麵包烘得外脆內軟，夾住入面金黃香脆嘅自家製炸薯餅。薯餅外皮炸到香口酥脆，入面嘅薯蓉、豆蓉軟綿香滑，混合咗大量惹味嘅印度香料，香氣豐富。特製醬汁辣度勁，開胃又過癮。
旺角 25/7/2026 14:00
潮汕沙茶湯牛魔王套餐 $70﹕牛魔王套餐配料極之豐富，有齊唔同部位嘅牛肉同牛丸，肥牛、滑牛肉肉質嫩滑且牛味十足；滑汕牛肉丸超彈牙爆晒汁，牛黃喉夠爽脆。最夾一定係茶湯底，湯底濃郁醇厚，味道微甜，火鍋麵吸滿晒精華湯汁，超級滿足！秘製醬汁蒜味十足，微辣刺激，撈麵勁正。
番茄湯底八寶套餐 $64﹕湯底有濃郁番茄香，酸甜開胃。自選八款配料非常豐富。其中豬大腸處理得好乾淨，滷得入味且煙韌軟糯；粟米蝦卷咬落有粒粒甜粟米，蝦肉彈牙；厚切午餐咸香十足；鯛魚片滑溜香甜﹔墨魚丸彈牙爽口，粒粒墨魚夠足料。每款配料同酸甜嘅番茄湯都夾到絕。
桂花蜜烏梅冰粉$15﹕真係消暑解膩嘅神仙甜品！烏梅冰粉口感晶瑩剔透，滑溜順喉，酸甜開胃。靈魂在於桂花蜜，平衡咗酸度，烏梅嘅微酸同桂花蜜嘅清甜好夾，仲有山楂果凍Q彈，味道十足，非常清新。
洛神花山楂蘋果茶 $12﹕開胃消滯嘅首選！味道濃郁酸香，冰凍飲落去酸咪咪、甜絲絲，喺大魚大肉之後飲一杯，真係瞬間解膩又舒服！
酸梅青檸烏龍茶 $12﹕基底選用咗清香嘅烏龍茶，帶有淡淡嘅茶韻同回甘。酸梅嘅醇厚酸甜，加上青檸嘅清新果香，口感清爽唔澀口，凍飲入口冰涼透心。
紅磡 24/7/2026 20:00
茄湯清甜魚飯 $79﹕蕃茄湯底鮮甜濃郁，又夠足料，超大一碗，超多魚肉，魚肉肉質結實滑嫰，吸滿茄湯精華後更顯鮮甜，將成個白飯放入，自製湯飯，成個配搭清新開胃，食完暖笠笠又舒服。
三鮮雞湯米線 $58﹕ 雞湯底熬到奶白香濃，飲落充滿膠質但又唔會油膩。米線口感爽滑彈牙，唔會過淋，配料非常多，款款都夠晒入味，最好食係小酥肉，豬肉肥瘦適中，肉質嫩滑之餘仲有豐富嘅肉汁，外層炸粉吸埋雞湯非常好食。
秘製雞翼 $22﹕一上枱已經聞到陣陣香味，雞翼炸到外皮金黃香脆，入面嘅肉質依然嫩滑，仲有豐富肉汁，加少少孜然粉，惹味十足，甜中帶微辣。
酸辣小木耳 $18﹕木耳食落爽脆彈牙，酸辣汁嘅調味啱啱好，酸度醒胃，辣勁溫和唔會嗆喉，蒜香同辣香非常平衡，冰涼爽口，又夠開胃。
