尖沙咀 10/1/2026 13:30

近排發現重慶大樓旁邊多左一個慶芳商場地下美食街，真係搵食新去處! 食街中間就見到一架車仔麵檔，原來係一間非常港式地道嘅車仔麵店，吸引!

大大碗車仔麵份量十足，一次過滿足幾個邪惡願望。豬大腸厚度十足，滷得好入味，外皮爽脆，中間充滿油脂香，真係邪惡又好食。牛腩係半肥瘦嗰種，炆到好腍身，肉味濃郁。豬手皮爽肉滑，充滿豐富嘅骨膠原，牛筋丸都係彈牙到不得了。淮山麵煙韌幼滑，吸湯力強，每一啖麵都掛滿咗濃郁香甜嘅腩汁，超好食。

另一碗試埋雞中翼都好有驚喜，肉質嫩滑，瑞士汁甜度啱啱好﹔仲有超彈牙嘅墨魚丸、菜肉餃皮薄餡靚，鮮味十足。另碗上嘅魚皮餃，魚皮更加爽滑彈牙，魚香味十足。

招牌必食厚叉燒真係份量十足，外層燒到焦糖色，油光亮麗，仲有少少焦邊，外層嘅焦邊帶點微脆，蜜汁味香甜濃郁，內裡嘅肉質非常鬆軟，半肥瘦每一啖都充滿肉香同油香，正!

冠軍奶茶港式風味，茶底夠香，味道少甜，讚!