馬鞍山 12/9/2026 13:00

今日收工去咗馬鞍山新港城中心大街嘅三叔廚房食晏。三叔肉絲雙麵黃，脆軟雙重口感好有層次，芡汁調配得好勻循，生煎包底脆皮軟，咬開肉汁鮮甜滿溢，水準好穩定。最後叫多一份豆沙鍋餅，香脆綿密，甜味唔太甜。價錢貼地，而且份量好足。

三叔肉絲雙麵黃 $88﹕份量勁大，兩個人分都絕對夠食，成碟麵堆到好似座金黃色嘅小山丘咁，炸麵條炸得好均勻。面頭淋滿晶瑩剔透嘅肉絲芡汁，肉絲、冬菇、芽菜等，都好足料。上面吸咗芡汁嘅麵條變得軟腍入味，底層依然保持酥脆，一啖咬落去有齊脆同軟兩種口感。

三叔生煎包 4隻 $40﹕四粒白雪雪嘅生煎包排得整整齊齊，頂頭撒咗滿滿嘅黑芝麻同翠綠蔥花點綴。翻開底部煎到底層呈現好均勻嘅焦金黃色，油光透亮好誘人。包皮頂部食落鬆軟棉密，底部就煎得好似餅乾咁香脆。一咬開肉汁即刻喺口入面爆發，豬肉濃郁鮮甜，油脂香氣同蔥香平衡，可惜唔算太熱，打了折扣。

豆沙鍋餅 $38﹕切好一件件嘅鍋餅整齊排好，餅皮煎到金黃微焦，表面鋪滿密密麻麻嘅白芝麻。中間夾住厚厚嘅紅豆沙餡，外層餅皮薄脆香酥，入面包住嘅豆沙餡就綿密幼滑，甜味自然，甜度控制岩岩好。

老闆娘送飲品，熱豆漿味道幾清甜，豆味香，不錯。