紅磡 13/8/2026 14:30

金記南洋冰室午餐非常抵食，份量足，味道唔錯。可加配小食，仲可以半價升級特飲。

無骨海南雞飯 $72﹕賣相不錯，切得整整齊齊，雞皮爽脆彈牙，皮下脂肪極少，肉質嫩滑多汁。附上嘅靈魂三色醬汁，包括惹味嘅薑蓉、酸辣嘅泰式辣椒醬同埋香濃嘅黑醬油，沾埋一齊食令雞肉嘅鮮甜層次更加提升。雞油飯粒粒分明，濃郁嘅雞湯同香茅香氣。份量十足，水準之作。

扣牌海鮮叻喇沙滲滲 $72﹕一上枱已經香氣撲鼻，湯底濃郁順滑，椰香味濃，帶有微辣同香茅，好惹味。配料豐富，有新鮮彈牙嘅大蝦、索滿湯汁嘅豆腐卜、魚片同埋水煮蛋。最特別嘅係麵底採用咗「滲滲」，即係將油麵同米粉撈埋一齊煮，雙重口感，吸晒精華，非常好食。

炸春卷 $20﹕春卷炸到外皮金黃酥脆，非常鬆化。內餡包滿咗豐富嘅新鮮蔬菜絲，包括爽脆嘅椰菜、甘筍等。隨春卷會附上一碟酸甜開胃嘅越式甜辣醬，沾少少黎食即刻中和咗炸物嘅熱氣。

椰汁珍多冰 $15﹕底部係香濃嘅椰漿同特製糖漿，濃郁嘅椰香同奶香完美融合，入口順滑無比，甜度亦都控制得啱啱好，入面仲有煙韌嘅珍多條，增添口感。

蝶豆花什果特飲 $11﹕飲品呈現出迷人嘅漸層藍紫色，同什果嘅橙色，視覺效果滿分。加入咗有氣梳打水之後，飲落口感清爽刺激，充滿微氣泡嘅爽快感。入面加入咗大量新鮮嘅什果粒，酸甜滋味，透心涼。

全單$190，值得再來。