旺角朗豪坊 1/8/2025 13:30

旺角朗豪坊發現小薯茄! 公仔太可愛，主打台式輕食，價錢唔貴，食完午餐再食埋甜品直落。

薯茄樂園餐 $108﹕超豐富! 薯茄刈包實在太可愛，包包面有小薯茄Logo，中間係兩大片腍滑嘅牛腱，加上帶微辣嘅酸菜，開胃! 番茄雞絲烏冬細細碗，係雞絲多，番茄湯好濃郁。宇泥地瓜球脆卜卜，中間芋泥綿密。自選飲品一杯揀左草莓奶蓋芒沙HUNTER，名字夠爆，士多啤梨同芒果味香濃，鮮味十足，奶蓋帶微咸，冰涼清爽之選，加一粒靚靚嘅馬卡龍，必試! 最最最緊要就係隨機送一個超可愛嘅鎖匙扣，真係好似抽盲盒咁興奮!

午餐 $88﹕呢個午餐抵食! 滷肉飯配三款餸，份量飽足。滷肉係半肥瘦五花肉切成小塊，肉質軟腍，油香滿滿，充滿台灣風味，送飯一流。牛肋肉大大件，煮得非常入味，亦好鍾意帶筋嘅爽滑感。仲有半隻勁入味嘅滷蛋同酸菜，真係份量十足。香酥雞扒炸到金黃酥脆，肉質鮮嫩，微微辣度剛好。台灣腸腸衣脆卜卜，肉汁爆多。隨餐有兩粒黃色嘅茶凍啫喱，茶味濃，冰爽! 老友揀左宇治抹茶紅豆串串沙冰(加$23)，抹茶味香，紅豆綿蜜香甜，超正! $18加配炸花枝丸，海鮮味濃，爽口彈牙，不錯!

追加夜市套餐揀左一份雞捲$30，薄豆皮炸到金黃酥脆，中間包住足料嘅雞肉餡，油亮光澤鮮嫩多汁，中間仲有瓜菜嘅爽脆口感。真係好有台灣夜市嘅風味。

抹茶金時芋圓$38﹕份量大，除左抹茶冰底抹茶奶香味濃，大量仙草、甜甜嘅紅豆、煙韌嘅芋圓，最好食就係類似豆腐嘅奶凍，奶香味濃又夠滑。

雲朵波霸泰奶冰$35﹕泰清涼綿綿冰系列應該係夏日限定，泰奶勁香茶味，綿綿冰打得非常幼細，奶蓋厚厚一片鬆鬆軟軟呈現雲朵效果，奶香帶微咸嘅味道同泰奶好配合， 波霸煙煙韌韌，黑糖味香，完完全全係冰凍版泰式珍珠奶茶，大愛!

雖然唔係小薯茄粉，只識「雪櫃冷笑話」。但呢間小店出品實在不錯，價錢唔貴，午餐食到下午茶，飲品甜品樣樣都唔錯。賣相靚，公仔得意，值得bookmark!