尖沙咀 14/6/2025 13:30

歷史博物館睇完兵馬俑展覽，就係尖沙咀附近搵食。呢間味吉長龍拉麵，原來係同石亭、沃川居酒屋都係同一個老細，新開分店主打拉麵，即管一試。

海龍 鹽味濃清湯蛤蠣拉麵 $118﹕賣相吸引，拉麵上除左兩大片叉燒之外，仲舖滿大大隻蛤蠣。呢度主打濃清湯，介紹話採用新鮮豚肉豚骨同日本蔬菜熬煮，湯底真係非常清澈，非常鮮甜，清爽唔油膩。呢款湯底就以簡單鹽味為基底，味道恰到好處，加上蛤蠣，湯頭滲透著啖啖天然海味。蛤蠣粒粒脹卜卜非常飽滿，肉質鮮甜多汁，食得出的新鮮。麵條粗細適中，要求嘅硬度都做到。兩大片慢煮叉燒相當驚喜，薄薄一片肉質非常柔嫩，可算一咬即化，而且啖啖豚肉甜香。溏心蛋醬油味香濃，質感滑嫩，蛋黃溏心度剛好。

巨龍 特盛慢煮叉燒濃清湯拉麵 $108: 巨龍真係極度澎湃，叉燒舖滿整個湯碗，份量十足。呢款湯頭係清湯基楚上加上醬油，清湯更加惹味香濃。慢煮叉燒就係一大亮點，每片都肥瘦適中，叉燒都吸滿醬油湯香味。呢碗配料特別加左炸日本牛膀條，炸粉薄薄地加左啲調味，口感爽脆，咸酥可口，驚喜!

午市可以加$38加配一款前食同飲品。

鮮蟹肉忌廉薯餅﹕估唔到細細偉薯餅上疊滿蟹肉同蟹籽，非常誘人。本身薯餅炸得香脆，薯蓉綿密，忌廉多到一咬爆漿，加上鮮嫩蟹肉更加好味，蟹籽脆卜卜，配上酸酸甜甜嘅蛋黃醬，滋味。

自家製魷魚豚肉餃子﹕大大隻餃子，仲有冰花薄脆，外皮仲黃金酥脆。餡料蔬菜豚肉嘅基礎上加上魷魚，本身豬肉餡鮮甜多汁，加上大大粒魷魚，鮮甜彈牙，呢個組合口感豐富相當不錯。

兩支日本飲品口味幾特別，並非平價貨，不錯。