尖沙咀 8/6/2025 12:00

今日來尖沙咀試呢間餐廳，被佢嘅濃湯花膠雞火鍋吸引。

濃湯花膠雞鍋 $198: 湯底淡淡奶黃色澤，入口鮮雞甜味，濃郁醇香但唔油膩，口感幼滑，啖啖膠原。半隻雞份量十足，睇得出非常新鮮，輕輕煮八分鐘撈起。雞肉肥瘦適中，肉質非常嫩滑爽口，雞味濃郁，真係好新鮮。花膠就係另一大亮點，煮過後質地軟腍，吸收晒湯底嘅鮮美精華。

火鍋配菜選擇非常多，多款肉類、海鮮、手工丸、蔬菜等。揀左黑毛豬腩片($108)、鳳城水餃($38)、魚皮餃($38)、魚腐($48)同稻庭烏冬($33)。

黑毛豬腩片層層疊起成山形，用菜墊底，但份量都幾多。肉片肥瘦相間，賣相靚。輕輕煮至熟透，肉質爽滑鮮嫩，食得出天然嘅豬肉鮮甜。肉片仲吸收左雞湯精華，味道更加鮮甜。

鳳城水餃有四大粒，粒粒都脹卜卜，內餡飽滿扎實，餡料係鮮豬肉、蝦仁、木耳等，鮮甜多汁，味道豐富。

魚皮餃外層薄而透明，帶有微微韌性，餡料鮮嫩，淡淡海鮮香，入口既爽滑不失咬勁。

魚腐大大粒，魚味香，幾新鮮，就好似一舊海綿咁吸收晒湯汁，一咬爆汁。

稻庭烏冬絕對係火鍋澱粉質最佳之選。烏冬柔韌富彈性，本身麥味香濃，吸收左湯底精華，口感更滑順更香甜。特別適合作為火鍋的收尾，滿滿飽腹感。

最後飲一啖火鍋湯，味道更加濃縮，超級香甜，雞味咸香更濃，而且膠質豐富，真係非常滋補。兩大兩細都食到飽飽，非常滿足。